Prezidente Komisaun Anti Korupsaun (KAK), Komisariu Aderito de Jesus hateten husi total kazu korupsaun 16 ne’ebe sira investiga ona hahu Fevereiru to’o agora, kazu korupsaun 6 mak entrega ona ba iha Ministeriu Publiku (MP) atu halo investigasaun tuir prosesu legal nian.
“Ami nia investigadores sira ne’e foin hetan formasaun fulan rua deit maibe sira bele ona kaer kazu no halo investigasaun,” hateten Komisario KAK Aderito de Jesus, semana kotuk iha nia knar fatin Farol,Dili.
Tuir nia, investigadores sira presiz tuir formasaun durante fulan 6 ou to’o tinan ida, nune’e bele sai investigador ne’ebe diak iha future.
Maske KAK foin entrega kazu korupsaun 6 ba MP, maibe nia parte kontinua halo investigasaun ba kazu hirak ne’ebe seidauk.
KAK entrega kazu korupsaun ba MP, tanba sira mak iha poder atu halo akuzasaun ba iha tribunal e oras ne’e dadaun MP halo hela investigasaun ba kazu sira ne’e.
Entretantu tuir Diretor Ezekutivu Programa Monitorizasaun ba Sistema Judisial (JSMP), Luis Oliveira Sampaio katak, kazu 16 ne’e iha faktus ne’ebe aprovadu, tanba iha evidensia ne’ebe sufsiente hodi kondena koruptor.
“Iha rekezitu ruma hatudu ona katak ema ne’e halo korupsaun, entaun ministeriu publiku kondena ba tribunal maibe karik tribunal rekursu ka tribunal konsidera kondena la ho evidensia forte, entaun husik fali sira hala’o sira nia atividade hanesan bai-bain,” Sampaio dehan.
Nia hatutan, iha prosesu investigasaun sei aprezenta faktus ba juridiku, sira hare kuandu prenxe ona rekezitus ruma sei avansa ba prosesu julgamentu iha tribunal.
“Prosesu kontinuasaun ba kasu sanulu resin neen ne sei halo investigasaun maibe neen nebe mak iha ona MP hodi halo investigasaun ne ami husu ami husu konfirmasaun ho director sira maibe la fo lisensa atu tama tanba ho rasaun preokupa ho servisu neduni akompanha nafatin prosesu investigasaun ba oin,”nia preokupa.
