Dala ida tan governu Australia liu husi programa Capacity Building Research Scholarship fo bolsu estudu ba Timor oan na’in 5 atu ba hasai maestradu iha Universidade Charles Darwin.
“sira nain lima ne’e sei ba hasai area jestaun, ambiental, peskiza no doutoramentu iha Universidade Charles Darwin (UCD),” informa Vise Ministru Edukasaun (VME) Paulo Assis Belo, semana kotuk iha konferensia imprensa iha Vilaverde,Dili.
Bolsu estudus ne’e oferese servisu hamutuk Ministeriu Edukasaun ho Universidade Charles Darwin e bolsu estudus ne’e fo liu oportunidade ba funsiunariu timor oan ne’ebe mak profesionalizmu.
Tuir Paulo, bolseirus nain 5 ne’e finansia hamutuk Ministeriu Edukasaun ho Universidade Charles Darwin. “Ministeriu selu deit sira nia biaya hidup no biaya transporte Dili-Darwin, enkuantu kona-ba biaya kuliah, parte universidade mak toma konta, katak sira nain lima ne’e kuliah ho gratuita iha ne’eba,” Paulo dehan.
Husi bolseirus na’in lima ne’e, na’in 2 iha ona Australia, na’in rua sei iha Timor no na’in ida seluk sei identifika.
“Sira nain 4 ne’e mak Abilio Fonseca ne’ebe oras ne’e estudu hela iha Darwin kona-ba doutoramentu, Carlos Liborio França Alves, nia remata ona kursu Inglesh intensive iha Universidade Charles Darwin, no nain rua ne’ebe sei iha Timor mak Jose Quintao no Salavador de Jesus Soares,” hateten Diretor Ezekutivu ME, Edmundo Viegas.
“Salvador de Jesus sei desloka ba Darwin-Australia iha Novembru tinan ne’e no ida tan iha Marsi tinan oin,”.
Entretantu bolseiru Salvador de Jesus Soares, senti kontenti tanba bele hetan oportunidade diak hodi bele estuda iha Darwin hodi kompleta nia estudu.
“Hau kontente ho oportunidade ida ne’e atu ba estuda iha ema nia rai e bainhira hau fila mai hau sei implementa iha hau nia rai buat ne’ebe hau hetan iha universidade ne’eba,”nia promote.
Tuir nia, nia parte sei ba hasai kursu iha area direitus nian ho esperansa katak bainhira fila mai bele dezenvolve diak liu tan sistema justisauiha Timor-leste.
