Fatin fa’an ikan ne’ebé Governu harii iha Bidau-Lesidere ba vendedor ikan atu fa’an iha ne’eba maibé fatin ne’e oras ne’e abandona tanba klo’ot no ladun fo benefisiu ba vendedor sira.
“Ami la’os lakohi fa’an iha fatin ne’ebé Governu prepara ona, maibé fatin ne’e klo’ot liu e ami hadau malu de’it,” informa vendedor ikan, Agusto Castro,semana kotuk iha Lesidere,Dili.
Tuir nia, alende klo’ot mós fatin ne’e ladun fo benefisiu ba vendedor ikan tanba fatin ne’e do’ok liu. “Entaun ami tenke fa’an iha fatin ne’ebé ema hola lalais ami nia ikan,” nia dehan.
Tanba ne’e, nia hatutan, Governu tenke halo fatin ne’ebé luan nune’e sir abele uza no fa;an sira nia ikan iha fatin ne’e, sela’e sira kontinua fa’an iha dalan ninin sira.
“Iha dalan ibun ami hetan osan lalais, loron ida ami hetan $70,00,”nia hateten
Entretantu tuir estudante Universidade Nasionál Timor Lorosa’e (UNTL) Pedro da Costa, katak vendedor ikan tenke fa’an iha fatin ne’ebé Governu prepara ona.
“ Ita nia vendedor sira labele fa’an arbiru de’it ikan iha fatin ne’ebé publiku tanba bele afeta ita nia ambiente ne’ebé ladiak,” Pedro dehan.
Tuir nia, sidadaun ne’ebé diak tenke fo kontribuisaun ba dezenvolvementu nasaun nian, liu-liu oinsa mak bele fo imajen ne’ebé diak ba ema estranjeiru sira ne’ebé mai halo visita iha ne’e.
“Ita tenke fiar malu no hatudu ambiente ne’ebé diak ita nia rain,”nia dehan.
