Foinsa’e Timoroan nain 130 hosi distritu 13 nasaun laran nian participa iha Segunda Sesaun Parlamentu Foinsa’e iha Salao Ministeriu Negosius Estrangeriu, iha Dili, semana kotuk.
Parlamentu Foinsa’e inisiativa iha hosi Sekretaria Estadu Juventude no Desportu kolabora hamutuk ho UNICEF Timor-Leste hodi ajuda prepara lideransa futura nasaun Timor-Leste nian.
“Mehi ida atu prepara futuru lideransa Timor-Leste nian ohin loron sai duni realidade. Hodi apoiu makas husi UNICEF no perseiru sira seluk hanesan GTZ mak Segunda Sesaun Parlamentu Foin Sa’e ne’e bele halao iha fatin ne’e. Parlamentu Foin Sa’e hanesan eskola ida ba futuru lideransa,” hateten Sekretariu Estadu (SE) Juventude no Desportu, Miguel Manetelo, durante abertura oficial.
SE Manetelo fo valor ba representantes foinsa’e hosi distritos 13 ne’ebe marka prezensa iha fatin atu koalia no debate kona ba asunto oin-oin ne’ebe afekta liu liu foinsa’e sira nia moris.
Segunda Sessaun Parlamentu Foinsa’e hetan partisipasaun durante abertura hosi Vise Primeiru Ministru Jose Luis Guterres ne’ebe iha nia diskursu hateten katak nia sentí orgulhu tebes tuir eventu ne’e atu rona saida mak foinsa’e sira hosi distriturs iha atu koalia no debate.
“Hau orgullo tebes haree imi hotu iha fatin ne’e ohin loron hodi reprezenta distritu 13 iha Timor-Leste hodi tuir Segunda Sesaun Parlamentu Foin Sa’e. Iha fatin ne’e imi bele deskuti asuntu sira mak akontese iha imi nia destritu sira no fatin atu aprende atu nune’e rekomendasaun sira mak imi hasai mós tenke iha responsabilidade. Iha eskola mós imi tenke obedese imi nia mestri sira atu nune’e imi bele hetan valor diak,” hateten Vise PM Guterres.
Iha fatin hanesan, Reprezentante UNICEF Timor-Leste, Baba Danbappa, husu ba participantes atu diskuti ho diak asuntu oin-oin sira levanta relevante ba sira nia distritu ida-idak.
“Ohin imi hotu mai iha ne’e reprezenta distritu 13 hodi koalia no deskuti asuntu sira mak afeta imi nia moris, maibe imi tenke deskuti ho diak atu bele hetan susesu no rezultadu diak,” haktrui Reprezentante UNICEF Danbappa.
Segunda Sessaun Parlamentu Foinsa’e mos hetan partisipasaun hosi Reprezentante Sekretariu Jeral Nasoins Unidas, Sra. Ameerah Haq no dignatarius no komunidade.
