Sekretariu Estadu Formasaun Professional e Empregu (SEFOPE), Bendito Freitas husu ba traballador Timor oan ne’ebe ba servisu iha Korea atu servisu ho badinas, disiplina no mantein nafatin responsabilidade.
“Imi ba lori imajen Timor-leste nian, defende ita nia bandeira, ita nia dignidade hanesan traballador timor oan,” hato’o SE.Bendito Freitas, iha serimonia despedida ba traballador na’in 7 ne’ebe mak desloka tan ba Korea du Sul, semana kotuk iha Balide,Dili.
Bendito mos husu ba sira, atu servisu ho badinas nune’e bainhira fila mai bele dezenvolve nasaun Timor-leste ho diak iha future.
“Ita foin mak tinan 10 ukun aan, ita nia libertasaun foin liu dekada ida, kampu de servisu mak sai dezafiu bo’ot, tanba ne’e mak governu Timor-leste halo akordu ho governu Korea, atu imi bele ba servisu iha ne’eba alende buka osan mos buka esperiensia,” nia dehan.
Bendito husu ba traballador sira atu kaer metin ba lei no mantein nafatin ho esperitu unidade ho traballador timor oan sira e mos halo ligasaun nafatin ho traballador husi nasaun seluk.
“Liu-liu imi nia osan labele gasta arbiru,”.
Traballador nain 7 ne’e kompostu husi mane nain 4 no feto nain 3.
Entretantu Embaixador Korea iha Timor-leste,Syo Kyo Su, fo parabens ba traballador nain 7 ne’e e espera katak bainhira fila mai bele dezenvolve Timor liu husi esperiensia ne’ebe iha.
“Imi tenke aprende esperiensia Korea nian atu nune’e imi bele dezenvolve imi nia rai hanesan oinsa Korea bele deenvolve ninia rai ho lalais,”nia esperansa.
Tuir nia, iha tinan 50 liu ba, Korea mak hanesan nasaun kiak liu iha mundu e iha 1961, joven Korea sira ba servisu iha Jerman atu buka osan no buka esperiensia.
Entretantu Traballador Sergio de Araujo, husi sub-distritu Atauru, senti kontenti tanba liu husi programa ida ne’e nia bele ba servisu iha Korea.
“Hau ba servisu iha area peska nian ,hau ba servisu ne’eba hau hetan osan no mos hau bele hetan esperinesia nebe mak diak wainhira hau fila mai hau bele dezenvolve diak liutan area peskas nian iha Timor,”Sergio esperansa.
Iha fatin hanesan Trabalhador Justa da Costa Perreira, husi distritu Same esperansa katak, nia ba servisu iha korea bele manan tan esperiensia diak konaba agrikultura nian.
“Bainhira hau fila mai hau sei aplika buat ne’ebe hau hetan iuha Korea liu-liu kona-ba agrikultura nian ho diak liutan,”Justa dehan.
