Xefe Departementu Nutrisaun Ministeriu Saude (MS), Dirce Maria Soares hateten tuir rezultadu peskiza ne’ebe ministeriu halo hatudu katak numeru labarik mal nutrisaun sa’e maka’as tanba ekonomia familia uma laran la sufsiente atu hola hahan ne’ebe iha nutrisaun.
“Tuir hau nia hare, iha Tmor ema barak mak moris sei kiak, ekonomia uma laran menus, ambiente ne’ebe foer, bee moos laiha e mos tanba nivel edukasaun ne’ebe sei menus entaun ladun mendukung ninia pratika ba moris loro- loron e buat hirak ne’e halo labarik sira moras hela de’it no bele akontese moras malnutrisaun,” hateten Dirce Maria Soares, semana kotuk iha Kaikoli,Dili.
Dirce afirma, oras ne’e dadaun ministeriu estabelese ona grupu suporta inan, loke tan suku hadomi inan ho oan nomos programa SISCA ne’ebe halao iha teritoriu tomak hodi muda ema nia mentalidade.
“Maibe depende ba ema ida-idak nia konsensia ba moris , se nia hakark moris saudavel entaun halo tuir buat ne’ebe ema hanorin,” nia katak.
Entertantu, Graziela Mendes Ribeiro, Programa Officer Fundasaun Alola hateten,labarik ho mal nutrisaun kauza husi bainihra inan isin rua ladun fo konsumu aihan ne’ebe iha nutrisaun.
“Ita hare dalabarak bainhira inan isin rua ladun han aihan ne’ebe diak ba nia bebe entaun pengaruh labarik ne’e moris mai mos bele akontese malnutrisaun no wanhira bebe moris mai inan ne’e ladun perhatikan fo susu ben kinur ba nia bebe dala ruam semana ida ka rua deit bele fo susu formula ona ida ne’e mos bele fo impaktu ba labarik sira nia saude bele hetan malnutrisaun,”nia hateten.
Atu redus numeru mal nutrisaun ba labarik, laos deit responsabilidade Ministeriu nian maibe mos husi parte hotu.
