Ho mudansa klimatika ne’ebe halo rai rahun suar maka’as iha fatin-fatin, labarik 1.789 mak oras ne’e baixa iha Ospital Nasional Guido Valadares (HNGV) tanba moras via respiratoriu (Ispa).
“Moras ispa ne’e ataka ba labarik sira ho idade tinan ida to, o 14 anos tanba impaktu husi rai rahun, udan no malirin halo labarik sira kona lalais moras ne’e,” hateten Xefe Emerjensia, Enfermeira Lolita Maria, semana kotuk iha Bidau Toko Baru, Dili.
Tuir nia, oras ne’e dadauk moras ispa mak domina iha ospital e alende ne’e mos iha moras seluk hanesan sarampo no moras sira seluk.
Maske nune’e, parte ospital liu-liu enfermeirus no doutor sira esforsu aan nafatin hodi fo tratamentu ba sira e pasiente sira ne’e maioria husi distritu.
“Tanba ne’e husu ba inan-aman sira atu kuidadu oan sira labele halimar rai rahun, e sa’e motor karik labele hatur labarik iha motor oin,” Lolita husu.
Iha parte seluk Xefe Departamentu Estatistika no Informatika HNGV, Maria Hornay informa katak, durante tinan 2011 nia laran ema nebe mate iha HNGV mak hanesan iha sala departamentu enfermaria maternidade, pediatria, medicina, Cirurgia, VIP, Perinatolojia, ICU, Isolamentu, OT, Nifas, ho total hamtuk 318.
Iha sorin seluk Gabriela da Costa, inan ne’ebe hein hela oan baixa iha HNGV, hateten moras ispa no moras sarampo mak agora dadauk afeita ba labarik kiik sira tamba mudansa klimatika no rai rahun barak.
“Ita hatene katak realidade agora dadauk nee moras ispa mak domina liu iha ospital ne’e, no tuir fali mai moras sarampo, maibe kuandu ita nia oan sira hetan ona sintomas liu-liu hanesan sinal-sinal nebe mosu iha labarik sira nia isin ita nudar inan-aman mos tenki hatene, lalika tur nonok deit husik labarik nee, entaun kuandu tama ona ba grave ida nee ita nudar inan aman mak la kontrola I ita mak hakarak habadak labarik nia vida, kuandu sinal hirak ne’e mosu tenki lori ba fasilidade saude atu hetan tratamentu intensive,” Gabriela husu.
Gabriela mos sente kontente tanba nia oan komesa diak oitua maske seidauk 100% tanba ne’e nia parte fo agradesementu ba doutor no enfermeirus sira ne’ebe halo ona tratamentu ba nia oan.
