Orfanatu Santa Bakita oras ne’e dadaun halibur oan kiak sira ne’ebe inan-aman mate ona e iha labarik na’in 30 mak hela iha fatin ne’e.
“Iha ne’e ami simu deit labarik sira ne’ebe inan-aman laiha e ami bele suporta sira ba eskola to’o nivel universidade,” hateten Maria Cezarina, staf Orfanatu Sta.Bakita, semana kotuk iha Becora, Dili.
Tuir nia, Labarik hirak ne’e balun eskola iha Ensino Primaria Camea, Pre-sekundariu Patria Becora, , Sekundaria Hati Kudus Becora e nain 2 seluk eskola iha Universidade Nasional Timor-leste (UNTL).
“Sira ne’e ho idade tinan 5 ba leten, e sira hirak ne’e mai husi distritu Baucau, Viqueque, Lospalos no Liquisa,” nia hatutan.
Iha mos kriterius ba labarik sira ne’ebe tama iha orfanatu ne’e, primeiru sira nia idade tinan 5 ba leten, segundu familia tenke mai koalia ho Diretora orfanatu ne’e.
“Depois mak diretora haruka sira halo surat deklarasaun ida katak labarik ne’e oan kiak duni, laiha inan-aman e depois diretora asina foin bele simu sira,” nia esplika.
Orfonatu Santa Bakita hetan tulun husi doador sira husi Portugal, Ministeriu Solidariedade Sosial (MSS) no mos husi Gabinete Primeiru Ministru.
“Ami la’os suporta deit material ba sira maibe mos vida espiritual, e husi MSS ajuda fos, mina, supermi no husi Gabinete Primeiru Minstru suporta osan,” informa Maria.
Iha mos problema ne’ebe sira infrenta mak kona-ba bee moos tanba bee mai oras ida deit maran fali ona “ne’ebe ami iha ne’e uza bee tenke poupa,” nia dehan.
Entertantu Joaquim Francisco (12), oan kiak ne’ebe hela iha Orfonatu Santa Bakita, nia hela iha fatin ne’e tinan 2 ona e sente kontente tanba fatin ne’e fo seguru ba nia.
“ Hau kontente tanba orfonatu ne’e ajuda ami ne’ebe inan- aman mate ona, alende suporta ami ba eskola mos fo kursu ami hanesan Inglesh no Portugues,” nia kontente.
Entretantu bainhira jornalista tenta konfirma asuntu ne’e ba iha Ministeriu Solidariedade Sosial (MSS) liu-liu iha Diresaun Protesaun ba Labarik maibe la konsege tanba laiha fatin.
