Tanba fa’an sasan liu prazu, Ministeriu Turismu Komersiu e Industria (MTCI) liu husi Inspesaun Alimentar Ekonomia (IAE) kaer ema na’in 6 (loja na’in supermerkadu 6).
“Ida ne’e mak ami identifika ona bainhira ami tun no halo inspesaun ba area hotu liu-liu ba lozas sira e ami prende ona vendedores nain 6 ne’ebe fa’an sasan liu prazu, laiha kualidade no aat ona ne’ebe laiha posibilidade atu konsumu, e sasan sira ne’e mos ami prende ona inklui nia nain prosesu tiha ona,” hateten Xefe Gabinete Juridiku IAE, Salsinho Martins Corbafo, semana kotuk iha Matadouro, Dili.
Tuir nia, loza hirak ne’ebe fa’an sasan liu prazu no aat mak hanesan LB, LS, AB, J, AS no I e lei bandu sira atu fa’an sasan ne’ebe liu ona prazu, aat, falsu tanba fo impaktu ba konsumidores sira nia saude.
Nia esplika, sasan hirak ne’ebe liu prazu mak hanesan susu been, ikan sardine, biscuit, cocacola, fanta no sasan sira seluk. “Nia nain agora prosesa hela, balun nain selu ona multa e balun seidauk, ba sira ne’ebe seidauk ami kndena sira ho lei seluk hanesan lei krimi kuandu halai liu ba krimi, kuandu sira la kumpri sira nia dever sira kona lei criminal kodigu penal artigu 244 koalia kona-ba des ovedensia (ketidakpatuhan),” nia hatutan.
Kona-ba sira ne’ebe la kumpri lei ne’e, nia parte sei inkamina lori kazu ne’e ba iha polisia ou Ministeriu Publiku depois submete ba iha tribunal hodi halo julgamentu ba sira tanba viola ho kodigu penal.
“Sir abele tama prizaun durante tinan 3 ou multa.ami fo notifikasaun loron 10 deit maibe liu loron ne’ebe determina e sira halo tan mak supermerkadu ne’e sei taka,” nia dehan.
Entretantu tuir komunidade Fomento, Flavio Ximenes, nia parte ladun kontente tanba suopermerkadu sira ne’ebe iha Dili laran maioria loke husi ema estranjeiru e sira ladun fo interese ba saude komunidade sira nian tanba ne’e mak sira fa’an sasan liu prazu e balun aat ona.
“Ha’u apresia tebes ba servisu Inspesaun Alimentar nian kona-ba prende sasan no kaer loza nain sira ne’ebe fa’an sira nia sasan la ho kualidade nune’e labele fo impaktu ba saude komunidade nian maibe hau mos husu ba governu atu halo mos inspesaun iha distritu sira, labele iha deit Dili laran,” nia dehan.
