Tuir Deputada husi Bankada Fretilin, Cipriana Perreira, katak maske Planu Estratejiku e Dezenvolvementu Nasional (PEDN) pasa ona iha Parlamentu Nasional, maibe la signifika planu sei implementa bainhira partidu seluk mak kaer ukun iha 2012 ba oin.
“Ami la foti husi planu estratejiku ne’ebe mak agora dadauk Governu AMP foti maibe sei foti fali planu dezenvolvimentu nasional ne’ebe ema hotu fo ninia opiniaun,” hateten Deputada Cipriana Perreira semana kotuk iha PN.
Tuir nia, iha razaun tanba sa la implementa bainhira Fretilin manan iha 2012, tanba iha PEDN la inklui opiniaun husi Fretilin e Fretilin sei define fali nia programa seluk “la’os atu kopia tuir fali, ami foti deir area ne’ebe prioridade ba tinan 5 nian depois halo asaun,” nia dehan.
Alende ne’e tuir Deputadu Maria Carascaláo husi bankada Partidu Sosial Demokrata (PSD), katak partidu ida-ida iha nia programa rasik bainhira kaer ukun. “Balun ke latama iha PEDN konserteza bele muda tanba lei mos la taka dalan ba sira atu bele muda,” Mario hatan.
Tuir eis Vise Primeiru Ministru ne’e, katak planu estratejiku ne’e la’os planu ida ke murni maibe ne’e hanesan vizaun ida atu kompleta deit vizaun vinte vinte nian.
“Ne’e la’e, hanesan vizaun ida buat barak ke los, balun hau hare talves ladun aseitavel karik, pur ezemplu hau hare PEDN la koalia kona-ba perguruan tinggi swasta, kona-ba riku soin tasi laran, kona-ba osan mean, marmer inklui mina rai mos la koalia,” nia afirma.
Entretantu Deputadu husi bankada Partidu Demokratiku (PD), Rui Menezes hateten bankada opozisaun sira ne’ebe sai husi planu PEDN, la’os hasouru governu AMP maibe sira halo boikota ba dezenvolventu nasaun no nesesidade povu nian.
“Tanba ne’e partidu ne’ebe hakarak ukun tenke halo tuir povu nia hakarak, nia labele ba impoin fali nia hakarak obriga fali povu anti demokratiku,” nia dehan.
Tuir nia, PEDN la’os inventa maibe planu ne’e prioridade no nesesidade povu rasik mak sei hili.
“Tanba ne’e mak povu mos matenek , sei la tau sira nia konfiansa arbiru deit ba partidu politku sira nebe ke arogante la fiar povu ninia matenek la tuir prioridades ne’ebe povu rasik hakarak define,” nia katak.
