Prezidente da Republika DR.Jose Ramos Horta hateten iha Setembru tinan ne’e, Autoridade Bankaria de Pagamentu (BPA) sai Banku Sentral Timor-leste (TL) nian.
“Iha Setembru agora banku BPA sei sai banku sentral e ohin hau mai halo vizita iha ne’e hanesan vizita primeira vez e alende ne’e rona mos sira nia briefing kona-ba investimentu fundu petroliu e la’o ho diak, hateten Xefe Estadu bainhira halo vizita iha BPA semana kotuk iha Akait, Dili.
Tuir Premiadu Nobel da Paz ne’e, katak maske akontese krizi ekonomia iha mundu hanesan iha Eropa no Amerika, maibe Timor-leste nia finansas maka’as no solidu.
Alende ne’e Xefe Estadu preokupa kona-ba moeda Timor-leste nian ne’ebe sei uza dolar Amerika “Ital abele ansi halo moeda ida tanba ne’e la’os buat ida ne’ebe soberania ka la’e maibe ne’e surat tahan ida, ita halo tiha maibe la folin, la vale buat ida, halo ita mak moe fali,” nia dehan.
Tanba ne’e tuir nia, tranferensia BPA ba Banku Sentral la iha preokupasaun ida tanba BPA servisu kapas e ema hotu-hotu respeita no admira.
Entretantu Diretor Jeral BPA, Abráo Vas Conchelos hato’o parabens ba Xefe Estadu ne’ebe halo vizita ba sira nia fatin e oras ne’e dadauk BPA iha prosesu transferensia ba Banku Sentral.
“Hanesan ita bo’ot sira hatene Parlamentu Nasional iha fulan hirak liuba aprova tiha ona lei organika banku sentral Timor leste ninian no publika tiha ona iha jornal da republika iha 90 dias para lei ne’e tama iha vigor,” nia dehan.
Abrao hateten, iha 14 Setembru BPA bele marka ona transformasaun ba Banku Sentral Timor-leste nian.
“Bainhira transformasaun ba Banku sentral aktividade, funsaun kuaje hanesan deit ho ida ne’ebe agora dadauk BPA hala’o hela ne’e,” nia dehan.
Agora BPA haruka funsionariu BPA ninian ba hasai Post Graduate Program iha estranjeiru, nebe grupu lima nebe mak primeiru sei kompleta iha fulan Setembru, Grupu segundu nian agora dadauk halao hela,” e espera katak tinan oin bele kompleta ona e programa ne’e kontinua nafatin,” nia katak.ν
