Tuir Deputadu Rui Menezes, Timor oan ne’ebe oras ne’e hela iha estranjeiru lapresiza mai iha Timor maibe bele tuir votasaun iha embaixada ka konsuladu Timor nian iha estranjeiru.
“La presiza mai iha ne’e, maibe sira presiza trata sira nia dokumentus hanesan Kartaun Eleitoral, Bilete Identidade ka Pasaporte ne’ebe mak sei validu nune’e sira tuir votasaun iha nasaun ne’ebe sira hela ba,” hateten Deputadu Menezes, semana kotuk iha PN.
Tanba tuir nia,sira labele tuir votasaun iha rai liur bainhira sira laiha dokumentus hirak ne’e.
Entretantu Deputadu Domingos da Costa, hateten Parlamentu kria ona lei ida kona-ba votasaun ba timor oan ne’ebe mak hela iha estranjeiru.
“So ema ne’ebe mak pasaporte ka kartaun Timor nian, nia iha direitu atu tuir votasaun iha rai liur,” nia katak.
Nia hatutan, Parlamentu koalia ona ho Governu e Governu mos prepara tiha ona osan balun atu hala’o aktividade eleisaun iha rai liur.
“Maske nia Timoroan maibe laiha kartaun timor nian, nia labele tuir votasaun e nia lakon nia direitu,” nia dehan.
Entretantu bainhira jornalista koko atu confirma asuntu ne’e ba iha Prezidente Comisaun Nasional ba Eleisoens (CNE) maibe la konsege tanba laiha fatin.
