Autoridade lokál iha Suku Luca, Postu-Administrativu Viqueque, Munisípiu Viqueque, alerta kona-ba risku ne’ebé komunidade hasoru durante tempu udan, tanba kondisaun ponte mota Weelolo ne’ebé sai ameasa ba seguransa no moris komunidade.
Xefe Suku Luca, Manuel Gomes, husu ba kompaña konstrutora atu aselera servisu reabilitasaun Ponte Weelolo hodi prevene impaktu ne’ebé bele akontese durante tempu udan. Tuir nia, kada tinan bainhira tama tempu udan, mota Weelolo dala barak sae maka’as no dala ruma hamosu inundasaun iha área sira besik mota.
“Komunidade sira iha área ne’e sempre hela iha preokupasaun bainhira udan boot, tanba mota bele sae derepente no taka dalan. Ida-ne’e bele ameasa vida ema nian, liuliu labarik no katuas-ferik sira,” Xefe Gomes hateten iha nia servisu-fatin, Suku Luca, Munisípiu Viqueque.
Nia akresenta katak projetu reabilitasaun Ponte Weelolo importante tebes atu garante ligasaun entre aldeia Uma-Boot no fasilita movimentu ekonomia lokál no tanba ne’e, nia husu ba kompaña atu aumenta ritmu servisu, liuliu antes tempu udan boot.
“Infraestrutura estratéjiku ne’e liga área rurál ho sentru ekonomia, no kontribui ba dezenvolvimentu sosiál no ekonómiku komunidade iha Suku Luca no área sira besik,” nia afirma.
Xefe Suku ne’e afirma katak kondisaun ne’e la’ós de’it hamosu estragu ba estrada no infraestrutura, maibé mós lori difikuldade boot ba komunidade sira atu asesu servisu báziku hanesan merkadu, eskola no fatin tratamentu saúde.
Iha parte seluk, Site Engineer husi kompaña konstrutora, Inácio dos Santos, rekoñese katak projetu ne’e enfrenta dezafiu oioin iha terrenu, ne’ebé hamosu atrazu ba implementasaun servisu, liuliu kondisaun klima ne’ebé la previzivel no halo servisu labele la’o tuir planu normál.
“Durante fulan ikus ne’e, udan boot to’o agora, ne’ebé halo rai sai dodok no difikulta movimentu ekipamentu pesadu. Situasaun ida-ne’e mós lori risku ba seguransa traballadór sira iha kampu,” Site Engineer dos Santos hateten.
Nia afirma katak maske kompaña iha kompromisu atu remata projetu tuir prazu kontratu, realidade iha terrenu obriga sira atu ajusta métodu servisu no tempu implementasaun maibe kompaña sei kontinua halo esforsu máximu atu aselera servisu bainhira kondisaun klima permite.
“Ho kondisaun ne’ebé iha, ami la bele obriga servisu atu la’o lalais liuhusi padraun tékniku, tanba bele kompromete kualidade no seguransa ponte ne’e rasik. Ami prefere halo tuir prosedimentu loos atu garante katak ponte ne’e forte no dura,” nia dehan.
Nia mós husu ba komunidade atu komprende situasaun no iha pasiénsia durante prosesu konstrusaun. No nia nia garante katak kompaña sei kontinua koordena ho autoridade lokál atu asegura informasaun nafatin to’o ba komunidade.
Observasaun Jornalista TDW iha terrenu hatudu katak komunidade sira dadaun ne’e uza dalan alternativa bainhira mota sae, maibé dalan sira-ne’e dala barak la seguru no aumenta risku ba asidente.
