Deputadu iha Parlamentu Nasionál sujere ba Ministériu Edukasaun (ME) atu introdús Língua-Portugeza iha ensinu pre-eskolár sira, tanba língua ne’e mós hola parte ona iha identidade Timoroan nian.
Deputadu Joaquim dos Santos Borluli dehan, Língua-Portugeza la’ós de’it sai intrumentu komunikasaun iha administrasaun públika, maibé konsagra ona iha Konstituisaun Repúblika Demokrátika de Timor-Leste (RDTL) artigu 13 hanesan lian ofisial.
“Ita sujere ME tenke introdús Língua-Portugeza iha ensinu pre-eskolár, ida-ne’e obrigatoriamente,” nia dehan.
Nia dehan, dezenvolvimentu Língua-Portugeza atu di’ak iha eskola no iha futuru tenke hahú husi Ensino pre-eskolár tanba pre-eskolár mak sai baze atu aprende no fasil atu estudante sira hatene komunika uza Língua-Portugeza.
“Tenke introdús Língua-Portugeza hahú husi pre-eskolár nune’e tenke iha professór espesifiku linguistiku nian,” Deputadu Santos informa.
Nia dehan, sidadaun hotu tenke hatene ko’alia Língua-Portugeza, tanba sai ona lian ofisial, bainhira introdús iha ensinu pre-eskolár sira garante katak tinan 10 mai tan jerasaun foun sira hatene ona ko’alia ona.
Entretantu, Ministra ba Ministé Edukasaun (ME) Dulce de Jesus dehan, dadaun ne’e iha ensinu pre-eskolár utiliza mós Língua-Portugeza, maibé baziku liu-liu bazeia ba sira nia kapasidade.
“Iha pre-eskolár ita-nia estudante sira aprende de’it kona-ba kores, aifuan, animal, letra no númeru. Ida-ne’e ita-nia professór sira hanorin ho Língua-Portugeza nune’e mós Tetun atu sira bele komprende,” nia dehan.
Nia hatete, iha pre-eskolár hanorin la foku liu ba matéria, maibé halimar mós, tanba iha pre-eskolár ne’e maioria labarik husi tinan tolu (3) to’o tinan neen (6).
“Sujestaun sira-ne’e hotu ita simu hodi hadia dezenvolvimentu edukasaun iha Timor-Leste, tanba ida-ne’e ema hotu iha responsabilidade,” nia hatete.
Enkuantu nia dehan, kona-ba professór Língua-Portugeza foin lalais ne’e rekruta ona professór hamutuk na’in 67 hodi destaka ba iha eskolas pre-eskolár to’o sekunadriu.
“Professór hirak ne’e nafatin partisipa iha formasaun Língua-Portugeza nian hodi aumenta sira-nia kapasidade hodi transmite siénsia ba estudante sira,” nia informa.Nia dehan, governu nafatin investe iha kapasitasaun ba professór sira la’ós de’it ba Língua-Portugeza, maibé ba mós siénsia sira seluk.
