Pasiente Sentru Saúde Comoro (SSC) preokupa ho kualidade atendimentu husi pesoál saúde sira, husu instituisaun saúde tenki hadia sistema atendimentu atu komunidade bele hetan tratamentu saúde ne’ebé di’ak no efisiente liu.
Pasiente Angela Pinto dehan prosesu atendimentu ba pasiente sira dala ruma la la’o ho di’ak, tanba pasiente balun tenke hein tempu naruk antes hetan atendimentu, situasaun hanesan ne’e dala ruma halo pasiente sira sente kontente, liu-liu ba sira ne’ebé moras todan ka mai husi área dook.
“Pasiente sira mai sentru saúde ho esperansa atu hetan tratamentu lalais, maibé dala ruma ami tenke hein oras barak molok halo tratamentu no informasaun husi pesoál saúde sira mós ladun klaru, dehan hein lai pasiente barak hela. Maibé ita haree tama ba laran sira tur buti hela telephone, depois ita ko’alia sira komesa hirus ita no hakilar de’it,” dehan Angela iha Sentru Saúde Comoro, Dili, hafoin halo taratmetun ba Saude.
Nia akresenta katak komunikasaun entre pesoál saúde no pasiente sira importante tebes atu garante pasiente sira kompriende di’ak kona-ba sira-nia kondisaun saúde no tratamentu ne’ebé mak sira hetan.
Angela husu ba autoridade sentru saúde atu tau atensaun liu ba kualidade servisu atendimentu no hasae disiplina servisu pesoál saúde sira.
Aleinde ne’e nia mós fó sujestaun katak sentru saúde bele organiza formasaun ba pesoál saúde sira, liu-liu kona-ba forma komunikasaun ho pasiente sira, étika servisu no maneira atendimentu ne’ebé respeita dignidade pasiente sira.
Responden ba preokupasaun ne’e, Xefe Sentru Saúde Comoro, Emilia A. de Sousa hatete parte administrasaun rona hela keixa no sujestaun husi komunidade, no konsidera informasaun hirak ne’e importante atu hadia servisu saúde iha sentru refere.
“Ami rona hela pasiente sira-nia preokupasaun. Iha futuru ami sei hadia prosesu atendimentu no fó formasaun ba pesoál saúde sira atu sira bele halo servisu ho di’ak liu. Tanba ne’e instituisaun sei halo avaliasaun interna ba sistema atendimentu ne’ebé la’o daudaun atu identifika parte sira ne’ebé presiza melloria” dehan Xefe Sentru Saúde Comoro Sousa.
Nia dehan sentru saúde mós planeia atu organiza formasaun ba pesoál saúde sira atu hasa’e kapasidade profissional, liu-liu iha área atendimentu ba pasiente sira. Tanba ne’e, instituisaun saúde tenke asegura katak pasiente sira hetan atendimentu ne’ebé di’ak, respeitu no profesional.Nia mós husu ba komunidade atu kontinua fó sira-nia opiniaun no sujestaun bainhira hasoru problema iha servisu saúde. Tanba, feedback husi komunidade importante tebes atu ajuda instituisaun hadia servisu no responde ba nesesidade pasiente sira hetan atendimentu ne’ebé diak liu, lalais no kualidade.
