Dadaun ne’e kada estudante Institutu Politeknika Betanu (IPB) kada fulan hetan subsídiu alozamentu hamutuk $30, tanba dadaun ne’e dormitoriu ba estudantes sira laiha.
Ministru Ministériu Ensinu Superiór Siénsia no Kultura (MESSK) Jóse Honorio da Costa Pereira Jerónimo dehan, dormitoriu ba estudante sira liu-liu iha IPB nian ladi’ak no dadaun ne’e iha hela ba prosesu konstrusaun.
“Dadaun ne’e governu fó subsídiu alozamentu ba estudante IPB kada fulan hetan $30 hodi selu uma ba sira hela provizóriu,” nia informa.
Nia dehan, subsídiu ne’e ba de’it estudante sira ne’ebé husi munisípiu no postu seluk, maibé ba sira ne’ebé iha Betanu sira lahetan subsídiu $30 ne’e, tanba sira iha uma rasik.
“Subsídiu $30 ne’e hodi selu uma provizoriu hodi hein konstrusaun dormitóriu ba estudante sira ne’ebé mak dadaun ne’e ita halo kompleta no fasilidade sira ba estudante hodi utiliza,” Ministru MESSK Honorio hatete.
Nia dehan, antes ne’e dormitoriu iha, maibé estudante sira utiliza tinan barak ona balun kuidadu no balun lakoidadu ikus mai tenke estragus.
Entretantu Prezidente Institutu Politeknika Betanu (IPB) Alcino Isaac da Costa Andrade dehan, ezistensia IPB ne’e ho objetivu atu kontribui ba abilidade hodi kompete ba merdadu traballu.
“Durante ne’e ita iha dezafiu barak mak estudante sira hasoru, liuliu kona-ba fasilidade prátika nian, maibé ida ne’e governu hahu rezolve ona balun, kona-ba dormitoriu seidauk no iha prosesu nia laran,” nia salienta.
Nia hatete, dormitoriu antes ne’ebé estudante sira hela ba kondisaun ladi’ak no la ijiene ba estudante sira hela, tanba ne’e governu fó ona dalan seluk hodi fasilita estudante sira liu-liu iha dormitóriu nian.
“Ita nia estudante ne’e mak dadaun ne’e hala’o estudu iha IPB hamutuk 448, sira-ne’e maioria husi munisípiu no postu seluk, iha ida ka rua de’it mak husi Betano,” nia salienta.Alende ne’e nia dehan, subsídiu alozamentu ne’ebé governu liuhusi MESSK apoiu ne’e maioria estudante hetan 30$ kada fulan hodi selu uma iha na’in 24 mak la hetan tan sira husi Betano.
