Rede Edukasaun Timor-Leste Coalition for Education (TLCE) kolokasaun profesór sira ne’ebé foin lalais akontese ne’e la rezolve problema falta profesór iha eskola, tanba foti fali profesór husi eskola ida ba koloka fali iha eskola seluk.
Koordenadór TLCE Jose Monteiro hatete, tuir monitorizasaun ne’ebé mak durante sira halo kona-ba kolokasaun profesór ne’e hatudu katak foti fali profesór iha eskola sira ne’ebé laiha problema menus profesór hodi ba koloka no kompleta fali iha eskola seluk no eskola anterior enfrenta fali problema menus profesór.
“Ita bele dehan katak kolokasaun profesór larezolve problema falta professór iha eskola, maibé kontinua aumenta,” nia dehan.
Nia dehan, profesór sira ne’ebé foin halo rekrutamentu ne’e la’os ba profesór foun, maibé profesór sira ne’ebé antes ne’e hanorin hela iha eskola ho estatutu kontratadu no voluntáriu sira, tanba ne’e mak la rezolve problema falta profesór iha eskola.
“Sira foti fali profesór husi eskola ida ba koloka fali iha eskola seluk,” Koordenadór TLCE Monteiro informa.
Nia hatete, atu rezolve problema falta profesór ne’e tenke halo rekrutamentu foun ba estudante finalista iha área edukasaun nian nune’e bele kompleta problema menus profesór iha eskola sira.
Entretantu, Diretór Nasionál Rekursu Umanu iha Ministériu Edukasaun (ME) João Amaral dehan, kolokasaun professór ne’ebé mak ME durante ne’e halo bazeia ba kuadru pesoál profesór nian.
Nia dehan, ME rekoñese dadaun ne’e eskola hotu enfrenta problema menus professór, maibé antes atu halo xamada no kolokasaun ministériu sei identifika ona eskola sira.
“Ita koloka professór sira primeiru ita iha uluk kuadru pesoal, depois ita mós sei identifika uluk eskola sira ne’e nia nesesidade, hafoin ita halo kolokasaun,” nia informa.Nia dehan, dadaun ne’e ministériu sei servisu hamutuk ho diresaun ensinu sira hodi halo kolokasaun fila rekrutamentu nune’e bele koloka tan ba eskola sira, tanba ne’e kleur ka lalais Ministériu Edukasaun sei rezolve problema menus professór.
