Fundasaun Mahein (FM) husu Ministériu Justisa (MJ) atu loke prosesu ba membru Polísia Sientífika Investigasaun Kriminál (PCIC) ne’ebé uza pistola hodi baku nia feen.
Diretór Ezekutivu FM Nelson Belo dehan, liga ba kazu ne’e MJ no PCIC mak tenke prosesu, tanba membru refere komete kazu violénsia doméstika hasoru nia feen no uza arma fora husi oras servisu.
“FM husu Ministériu Justisa tenke loke prosesu ba membru PCIC ne’ebé mak uza pistola baku nia feen,” nia dehan.
Nia hatete, aktu ida-ne’e labele tolera, tanba PCIC ne’e la’ós foin akontese, maibé akontese beibeik ona, tanba ne’e tenke prosesu nune’e membru refere bele responsabiliza ba aktu ne’ebé nia halo liuhusi prosesu kriminál no sansaun disiplinar ka demite.
“Ita husu atu kontrola membru sira uza arma, bainhira uza tenke tuir ordem servisu ou iha oras servisu nian, fora husi oras servisu tenke hatama fila fali no labele lori ba uma,” nia dehan.
Nia dehan, iha regra ne’ebé rigorozu tebes, bainhira utiliza arma ba patrollamentu fila mai tenke halo relatóriu, kona-ba utiliza kilat ne’e, la uza halo relatóriu, kuandu uza mós halo relatóriu bala ne’e uza hodi tiru saida.
Entretantu, Ministru MJ Sergio de Jesus Fernandes Hornai dehan, kazu membru PCIC nian ne’e halo ona averigasaun ba membru refere ho inisiál OCA, tanba utiliza arma hodi halo violénsia doméstika hasoru nia fen.
“Prosesu investigasaun la’o ona no prosesu kontinua, ita sei la tolera aktu brutalismu hirak ne’e buras iha instituisaun,” nia hatete.
Nia dehan, iha kazu ida-ne’e bele foti medida hanesan submete ba prosesu legál tanba krimé nune’e mós aplika sansaun disiplinar.
“Sansaun hotu ne’ebé mak membru ne’e sei simu tenke bazeia ba rezultadu investigasaun nian,” Ministru MJ Hornai hatete.
Nia haktuir tan katak membru se de’it mak komete iha aktu sira hanesan ne’e superiór sira sei la husik livre maibé tenke prosesu.
