Ministériu Ensinu Superiór Siénsia no Kultura (MESSK) iha tinan 2026 kontinua tau prioridade hodi dezenvolve área siénsia teknolojia iha ensinu superiór iha Timor-Leste.
Ministru MESSK Jose Honorio da Costa Pereira Jerónimo dehan, dezenvolvimentu área siénsia teknolojia iha Timor-Leste importante tebes, hodi prepara forsa traballu no kria rasik kampu servisu iha futuru, bainhira estudante sira-nia remata estudu.
“MESSK halo ona kooperasaun ho Institutu Siénsia Teknolojia Mandala Surabaya no Universidade Estatál Surabaya hodi implementa programa sira iha siénsia no teknolojia nian,” Ministru Jerónimo hatete.
Ministru haktuir programa sei implementa no foku ba área siénsia teknolojia mak investigasaun hamutuk ho atribuisaun bolsu estudu, interkámbiu professór no estudante sira, nomós formasaun ba professór sira tuir prioridade estratéjiku ne’ebé ita define ona.
Nia dehan husi kooperasaun refere Institutu Siénsia Teknolojia Mandala Surabaya oferese bolsu estudu hamutuk 20 no Universidade Estatál Surabaya oferese bolsu estudu hamutuk 100 ba Timoroan sira hodi estuda kona-ba área Siénsia Informatika, Saúde no Ekonomia iha grau lisensiatura no mestradu.
Entretantu, Koordenadór Rede Edukasaun Timor-Leste Coalition for Education (TLCE) Jose Monteiro dehan, dezenvolvimentu setór siénsia teknolojia pasu importante, tanba dadaun ne’e siénsia ne’e avansadu tebes.
“Governu tenke investe nune’e bele fó oportunidade ba foin-sa’e sira hodi kompete área siénsia teknolojia no nasaun sira seluk,” nia informa.
Nia dehan, estudante barak mak iha skill di’ak kona-ba teknolojia, maibé espasu ba sira laiha hodi dezenvolve.
“Ita espera katak ho servisu kooperasaun ne’e governu kria ho universidade avansadu sira bele lori pasu pozitivu ba ita-nia estudante sira hodi dezenvolve skill ne’ebé sira iha,” Koordenadór TLCE Monteiro hatete.Alende ne’e nia dehan, presiza mós kompleta fasilidade sira kona-ba siénsia teknolojia nian atu estudante sira aprende iha eskola.
