Rede Edukasaun Timor-Leste Coalition for Education (TLCE) husu Ministériu Edukasaun (ME) presiza koloka guarda eskolár ba eskola sira ne’ebé seidauk iha hodi proteje fasilidade no aredór eskola nian.
Koordenadór TLCE Jose Monteiro dehan, eskola sira tenke tau guarda eskolár nune’e bele fó seguransa másimu ba fasilidade eskola nian nune’e mós bele kontrolu estudante sira iha oras tama no sai eskola.
“Ita husu Ministériu Edukasaun bele haree no koloka tiha guarda eskolár ba eskola ne’ebé seidauk iha atu fó seguransa nune’e bele kompleta tiha,” Koordenadór TLCE Monteiro informa.
Nia hatete, iha kapitál Díli tuir informasaun ne’ebé TLCE asesu iha eskola haat-nulu-resin-sia (49) mak seidauk iha guarda eskolár nune’e mós muro protesaun.
“Guarda eskolár ne’e importante tebes hodi asegura fasilidade no infraestrutura eskolár nian atu ema labele foti no estraga arbiru” dehan nia.
Entretantu, Ministra ME, Dulce de Jesus Soares dehan, kolokasaun guarda eskolár sira, ne’e ministériu sei haree no tau iha prioridade orsamentu 2026 nian nune’e bele halo rekrutamentu.
“Rekrutamentu ba guarda eskolár ne’e Ministériu Edukasaun sei fó konfiansa tomak ba parte eskola sira mak fó prioridade ba foinsa’e sira iha munisípiu ka postu administrativu iha eskola refere,” nia informa.
Nia hatete, loos duni katak eskola sira presiza pesoal seguransa hodi asegura eskola idak-idak, atu ema labele estraga fasilidade eskola no pinta eskola.
“Kolokasaun guarda eskolár ne’e ita sei tau iha prioridade orsamentu tinan 2026 nian nune’e ita bele rezolve,” ME Soares informa.Nia dehan, alende ne’e koloka guarda ME mós sei konstrui morru protesaun ba eskola sira ne’ebé to’o ohin loron seidauk iha muro protesaun.
