Governu liuhusi Ministériu Interiór (MI) konstrui ona postu ba Unidade Patrullamentu Fronteira (UPF) hamutuk haat-nulu (40) iha liña fronteira terrestre entre Timor-Leste no Indonézia.
Ministru MI, Francisco da Costa Guterres hatete, postu 40 ne’ebé koloka iha munisípiu tolu iha fronteira ho Indonézia hanesan, Bobonaro, Covalima no Oe-Cusse.
“Ita konstrui ona postu vizilánsia hamutuk 40 ba UPF hamutuk 40 iha fronteira,” nia dehan.
Nia dehan, postu ne’e atu fasilita membru UPF sira horik ba nune’e bele hala’o servisu vizilánsia ba atividade ilegál.
“Konstrui postu hirak ne’e, tanba postu ne’ebé durante ne’e utiliza kondisaun aat no laiha fasilidade,” nia informa.
Nia hatete, postu 40 ne’ebé foin konstrui ne’e kompleta ho fasilidade hanesan dapur, kuartu, armariu, bee moos, eletrisidade, nune’e mós halo estrada.
“Postu hirak ne’e maiória ita finaliza ona konstrusaun no intrega ona ba UPF hodi utiliza falta haat (4) mak seidauk tanba sei iha prosesu instalasaun bee moos, eletrisidade, nune’e mós halo dalan seidauk hotu,” MI Guterres informa.
Alende instalasaun ba fasilidade hirak ne’e governu mós sei monta Internet no ekipamentu sensitivu balun hodi fasilita kontrolu ho di’ak atu ema labele tama no sai arbiru.
Enkuantu nia hatete, pontu entrada mós tenke jere ho di’ak, atu nune’e hodi dada ema estrajeiru sira mai investe iha Timor-Leste.
Entretantu, Komandante Unidade Patrullamentu Fronteira (UPF) Superintendente Euclides Belo dehan, postu foun hirak ne’ebé governu konstrui ne’e fasilita tebes membru sira hodi halo servisu vizilánsia.
“Durante ne’e ita-nia fasilidade sira iha postu ne’e kondisaun ladi’ak nune’e mós laiha bee moos no eletrisidade,” nia inforam.
Nia hatete, postu fronteira tenke harii hamutuk walu-nulu-resin-hitu (87) liga ho dalan hamutuk 87, ne’e hahú husi Munisípiu Bobonaro Covalima no Oe-Cusse.
“Balun konstrui ona balun seidauk konstrui ami-nia esperansa ba iha governu ne’e bele konstrui hotu postu 87 ne’e,” Komandante UPF Superintendente Belo informa.Nia informa, atu prevene atividade tama ilegál iha fronteira presiza kria kondisaun ba mémbru UPF, área fronteira luan tebes, depois menus ekipamentu, menus rekursu umanu.
