Família pasiente ho inisial PM hateten nia alin sofre asu tata ne’e maka familia buka meiu hodi lori ba lalais Hospital Nacional Guido Valadares (HNGV) hodi bele hetan vasina anti-raiva (VAR), maibé aimoruk la iha ona.
“Ami hatene katak moras-raiva perigozu tebes, tanba ne’e mai HNGV ho esperansa atu hetan prevensaun imediata ba moras raiva liuhosi vasina, maibé to’o iha ospital pesoal saúde sira dehan vasina ne’e laiha ona,” dehan nia.
Nia mós kestiona, atu halo prevensaun ba moras raiva maka ai-moruk iha HNGV la iha ona, atu ba fali ne’ebé, asu ne’ebé tata pasiente ne’e afeta moras raiva ou lae familia pasiente seidauk hatane.
“Labarik ida bainhira hetan tata husi asu lori mai ospital dehan ai-moruk la iha, tanba ne’e ami husu ba governu no Ministériu Saúde hodi haree problema ne’e ho sériu,” nia hatete iha HNGV, Díli bainhira lori nia alin halo tratamentu, tanba asu tata.
Akadémiku Saúde Públika husi Universidade Díli (UNDIL) Mariano dos Reis hateten, fiar katak situasaun ida-ne’e reflete planeamentu no jestaun ne’ebé fraku ba kadeia fornesimentu ba vasina esensiál sira.
Nia subliña, ospitál referál no nasionál sira tenke sai sentru servisu ne’ebé prontu atu atende kazu emerjénsia sira hanesan tata husi animál ne’ebé infeta moras raiva.
“Disponibilidade hosi vasina anti-raiva hanesan elementu krusial ida hosi sistema resposta saúde públika nian. Ne’e la’ós de’it kona-ba servisu loroloron nian, maibé kona-ba prevensaun ba mate. Governu tenki garanti katak kadeia fornesimentu vasina nian la’o ho di’ak, distribuisaun hanesan ka ekitativu, no laiha stock out sira iha instalasaun prinsipál sira hanesan HNGV”, nia subliña.
Diretór Servisu Apoiu Diagnóstiku no Terapeutiku iha HNGV, Vidal de Jesus Lopes rekoñese katak, loos duni agora dadaun ai-moruk vasinasaun ba moras raiva stock limitadu hela, tanba ne’e mak klinika sira ne’e la iha hotu.
“Ami rekoñese katak vasina anti-raiva oras ne’e daudaun seidauk disponivel iha sentru saúde sira hotu, tanba limitasaun hodi halo distribuisaun iha Intitutu Nasional de Farmasia Produtus Medicos (INFPM) mós agora stock limitadu hela, entaun ita uza ba prevensaun emerjénsia de’it. Maibé, ami koordena ho UNDP ho WHO atu oinsa sira bele ajuda ai-moruk ne’e,” esplika Diretór Vidal.
Nia dehan, mós husu ba públiku atu mantein kalma, tanba buat hotu lao hela, lakleur tan ai-moruk ne’e komesa iha fali ona, MS ho HNGV la para halo esforsu atu garante kontinuade stock, atu nune’e hodi hatan ba preokupasaun komunidade sira-nian.”Ami husu komprensaun hosi públiku. Raiva hanesan problema ida ne’ebé maka sériu, no ami komprometidu hodi rezolve falta stock stoke ida-ne’e ho lalais ba seguransa pasiente nian”, nia konklui.
