Ministériu Edukasaun (ME) kontinua hadia kualidade iha Eskola Sekundáriu Tékniku Vokasionál (ESTV) sira iha rai laran hodi prepara estudante sira asesu ba kampu servisu no bele mós kria rasik servisu.
Sekretáriu ba Sekretariadu Estadu Ensinu Sekundáriu Jerál no Tékniku Vokasionál (ESG-ESTV) Domingos Lopes Lemos dehan, eskola tékniku vokasionál sira importante hodi dezenvolve kapasidade estudante sira nian iha area tékniku no prepara ba futuru ne’ebé di’ak.
Nia dehan, eskola téknika vokasionál kompostu husi Agrikola, Indústria, Mekánika, Hotelaria, no seluk tan governu fó prioridade hodi halo investimentu.
“Ita kontinua hadia ESTV nian kualidade liuhusi kompleta fasilidade prátika nian, laboratóriu nian hodi fasilita estudante sira aprende,” Sekretáriuba Sekretariadu Estadu ESG-ESTV Lopes dehan.
Nia dehan, kona-ba infraestrutura eskolár ba ESTV maiória di’ak hotu ona, ba fasilidade prátika mak sei menus, tanba ne’e ME kontinua fó prioridade hodi kompleta.
“ESTV Agríkola rua ita apoiu ona kareta Gran Max rua hodi fasilita sira transporta produtu ne’ebé sira iha merenda eskolár, ba oin ita sei distribui ba eskola ne’ebe sei iha prosesu identifika,” nia informa.
Nia informa, dadaun ne’e ESTV-Agríkola Nicolau Lobato Liquiçá dadaun ne’e mós halo plantasaun ba kafé, tanba ne’e governu presiza dezenvolve.
Entretantu Koordenadór Timor-Leste Coalition for Education (TLCE), Jose Monteiro dehan, apoiu ME investe iha Ensinu Sekundáriu Tékniku Vokasionál (ESTV) importante hodi hadia kualidade edukasaun iha Timor-Leste.
“Monitorizasaun ne’ebé ami halo espesífiku ba ESTV katak maioria la iha ekipamentu prátiku, infraestrutura la di’ak, inklui menus professór sira ne’ebé mak iha kualifikasaun hodi transforma siénsia ba estudante sira,” nia salienta.
Nia dehan, TLCE apoiu programa prioridade ME nian kona-ba kontinua investe iha ESTV hodi hadia kualidade edukasaun iha Timor-Leste no prepara estudante sira asesu ba kampu traballu no kria rasik kampu servisu.
Nia informa, ESTV ne’e kontribui tebes ba kualidade edukasaun, tanba estudante sira aprende teoria no prátika kedas, no kada tinan sira sempre sai primeiru lugar iha ezame nasionál.
“Ita haree iha loron pameran edukasaun nian sira bele halo bengkel, instalasaun ba eletrisidade, no hadia sasan eletróniku, balun bele halo dosi ne’ebé mak di’ak tebes no seluk tan,” Koordenadór TLCE Monteiro hatete.Nia hatete, haree ba realidade hirak ne’e TLCE apoiu governu hodi investe iha orsamentu jerál estadu nune’e bele halo dezenvolvimentu di’ak liu tan iha futuru.
