Prezidente da Repúblika Jose Ramos Horta husu governu liuhusi Ministériu Edukasaun (ME) atu moderniza setór edukasaun liuhusi rekrutamentu ba profesór foin-sa’e sira.
“Ha’u husu governu liuhusi Ministériu Edukasaun tenke moderniza setór edukasaun fó oportunidade ba joven sira sai profesór,” nia hatete.
Nia dehan, prosesu reforma ba setór edukasaun ne’e di’ak tebes hodi fó oportunidade ba jerasaun foun sira ne’ebé foin gradua iha nível lisensiatura husi universidade sira bele hanorin iha eskola sira.
Nia dehan, lisensiatura iha área edukasaun joven barak tebes ne’ebé mak iha abilidade di’ak, ida ne’e governu tenke utiliza sira hodi dezenvolve setór edukasaun.
Nia hatete, tuir nia haree prosesu modernizasaun no reforma iha edukasaun di’ak tebes, tanba ne’e apresia ba Ministra ME nia esforsu.
“Ha’u husu atu reforma ne’e kontinua no lalika ta’uk, tanba reforma radikál mak sei fó oportunidade ba jerasaun foun sira,” PR Horta dehan iha Matadouro, Díli.
Iha fatin hanesan, Ministra ME Dulce de Jesus Soares hatete, reforma iha setór edukasaun ne’e konsidera hanesan parte importante ba dezenvolvimentu nasaun nian, hodi hasa’e kualidade edukasaun no prepara jerasaun foun ba lideransa futuru iha Timor-Leste.
“Durante ne’e ita halo ona rekrutamentu ba profesór foin-sa’e hamutuk rihun-ida-atus-haat-hitu-nolu (1470) hodi kontribui ba modernizasaun iha área edukasaun,” nia hatete.
Nia dehan, dadaun ne’e (ME) kontinua halo rekrutamentu ba foin-sa’e sira ne’ebé hakarak dezenvolve Timor-Leste liuhusi setór edukasaun.
“Kandidatu ne’ebe admitidu hamutuk rihun-sanolu-atus-neen-hitu-nolu-resin-sia (10,679), partisipa iha teste ba bolsa kandidatu faze datoluk nian, iha área Ensinu Sekundáriu Jerál no Ensinu Sekundáriu Tékniku Vokasionál,” Ministra ME Soares informa.Nia informa, esforsu sira-ne’e hotu ME halo ho objetivu hodi moderniza área edukasaun iha Timor-Leste nune’e bele fó edukasaun ne’e ho kualidade ba jerasaun foun sira.
