Working Women Center Timor-Leste (WWCTL) identifika feto Timoroan hamutuk na’in 295 mak durante ne’e hala’o servisu hanesan traballadór doméstika iha kapitál Díli.
Diretora WWCTL, Ricar Pascoela Soares dehan, tuir dadus monitorizasaun ne’ebé iha, hatudu katak feto hamutuk na’in 295 ne’ebé husi munisípiu sira iha territóriu laran tomak mak hala’ knaar hanesan traballadór doméstika.
“Ita-nia maluk feto ne’e mak durante ne’e hala’o knaar hanesan traballadór doméstika iha kapitál Díli hamutuk 295 husi ne’e kuaze 54 mak sira-nia empregadór viola sira-nia direitu,” nia hatete.
Nia dehan, servisu doméstika ne’ebé mak feto maluk sira-ne’e halo mak hanesan, haree ema-nia oan, tein no fase ropa ba ema, no haree ferik no katuas sira.
“Traballadór feto hirak ne’e balun durante ne’e hasoru problema hanesan, saláriu la tuir estandar mínimu, balun empregadór viola sira-nia direitu ba lisensa sem osan bonus,” nia dehan.
Nia hatete, direitu ne’ebé viola mak hanesan, saláriu latuir estandar $115, maibé hetan de’it $70 ka $80 kada fulan no tuir loloos ne’e, sira tenke iha lisensa kada fulan dalan ida, maibé ida-ne’e sira lahetan.
“Ita-nia maluk feto sira-ne’e, durante ne’e lahalo protesta, tanba sira mai husi munisípiu no sira laiha koñesimentu kona-ba lei sira, tanba ne’e labrani atu fó sai situasaun ne’ebé sira hasoru,” Diretora WWCTL Pascoela informa.
Maibé nia dehan, WWCTL nafatin esforsu hodi luta hasoru atu traballadór doméstika sira hetan saláriu tuir estandar mínimu.
Entretantu Sekretária ba Sekretariadu Estadu Igualdade Elvina Sousa dehan, governu ho sosiadade sivíl sira sei halo sosializasaun ba empregadór traballu doméstika sira nune’e labele viola direitu traballadór nian.
“Traballadór sira hotu tantu doméstika no formál iha direitu ba saláriu mensál $115 la’os $70 ka $80,” nia hatete.
Alende ne’e nia dehan, presiza mós halo sosializasaun ba traballadór doméstika sira atu bele kontra saláriu $70 ka $80 iha sira-nia servísu fatin.
