Prezidente Konfederasaun Sindikatu Timor-Leste (KSTL) Alemerio Vila-Nova dehan, saláriu mínimu la sufisiente ba nesesidade família nian, liuliu folin sasan ne’ebé kontinua sae iha merkadu.
“Saláriu mínimu nasionál $115 ne’e lasufisiente hodi responde ba nesesidade família nian. Tanba ne’e husu ba governu urjentemente hasa’e saláriu mínimu nasionál husi $115 ba $160 kada fulan nune’e bele responde ba traballadór sira-nia nesesidade família,” Prezidente KSTL Vila-Nova dehan.
Nia dehan, valór saláriu mínimu $115, liga ba aihan no bebidas ne’ebé folin sa’e makaas kuaze 60%, sei hatun padraun moris servisu na’in sira-nian. Servisu na’in ka traballadór vulnerável sira sei hetan risku ba moris iha kondisaun mukit no ki’ak nia laran.
Nia hatete, durante ne’e servisu na’in sira iha Timor-Leste hasoru desigualdade iha nível istóriku kona-ba saláriu mínimu, no servisu na’in sira kontinua moris vulnerável.
“Ita-nia kustu moris boot tebes, sira fó tempu ba servisu iha oras ne’ebé naruk hodi luta ba saláriu ne’e mak ki’ik,” nia salienta.
Nia dehan, dalan ne’ebé atu rezolve ki’ak no mukit iha Timor-Leste ne’e mak tenke hasa’e saláriu mínimu ba traballadór sira tantu traballadór formal, doméstiku ka instituisaun privadu no públiku.
Alende ne’e nia husu govermu atu aselera Dekretu Lei ba salárlu mínimu nasionál hodi responde ba ejiénsia traballadór sira hotu iha Timor-Leste.
Entretantu traballadór Madalena Lay Gonçalves dehan, kona-ba hasa’e saláriu ne’e sira hakilar durante tinan barak ona, maibé sira-nia saláriu to’o agora seidauk aumenta, sira servisu husi dader to’o kalan, maibé saláriu nafatin.
“Ami servisu lahatene tuir oras ami tama tuku hitu dader dalaruma sai tuku ualu ka sia, maibé nafatin hetan $115 no kolega balun sei simu $80 no $70,” nia hatete.
Nia dehan, sira la kontente ho saláriu mínimu $115 ne’e lato’o, tanba la sufisente ba nesesidade uma-laran.
“Ami husu ba govermu sebele karik hasa’e netik ami-nia osan ituan tan, atu bele sente katak osan ne’ebé simu bele sufisiente ba ami-nia moris tomak,” nia husu.
Iha parte seluk Vise-Primeiru-Ministru Mariano Assanami Sabino dehan, lei ba saláriu mínimu nasionál iha ona diskusaun Konsellu-Ministru nian no ba oin sei deskuti.
“Ita iha ona estandar ba saláriu mínimu, maibé ita halo diskusaun hodi bele hetan aprovasaun maske natoon, maibé bele responde ba traballadór sira-nia moris,” nia dehan.
Nia dehan, governu tenke haree ona, tanba nesesidade moris ne’e defisil buat hotu karun.
