Diretór Agrikultura Munisípiu Manatuto, José Soares hateten natar hektár rihun-rua-atus-neen (2.600) iha Munisípiu Manatuto abandonadu tanba irigasaun nakonu ho rai henek no foer.
“Natar iha Munisípiu Manatuto ne’e hektár rihun-tolu (3000), maibé irigasaun boot ne’ebé konstrui husi ajensia JICA (Japan International Coorporation Agency) iha tinan 2002, to’o agora seidauk iha manutensaun.
Iha tinan ida-ne’e fulan Marsu udan boot mota lori rai henek no foer taka metin tiha irigasaun, ho nune’e natar 2600 mak abandona, tanba bee la iha,” dehan Diretór Soares liuhusi telefone.
“Bainhira ajénsia internasionál JICA sei kaer ne’e halo hela manutensaun ba irigasaun sira, maibé depois de entrega tiha mai governu, manutensaun la halo to’o mai agora,” nia afirma.
Nia hatutan, tinan kotuk 2024 natar sira-ne’e la’o di’ak hela, maibé tinan ida-ne’e mak natar lubuk ida mak abandona de’it.
“Agora dadaun natar nain sira uza de’it bee kanu tradisional hotu hodi halo natar sira ne’ebé mak bele bele tama, enkuantu sira ne’ebé mak la bele tama entaun husik de’it, tanba ne’e ita presiza ema atu hamoos irigasaun sira ne’ebé nakonu ho rai henek no foer sira,” nia haktuir.
Nia salienta, bee kanu tradisional sira-ne’e, udan tau mota tun estraga hotu, entaun nain sira hadia fali de’it.
“Bee kanu tradisional sira-ne’e udan mai estraga tiha, maibé ita nafatin organiza komunidade sira hodi hadia fila fali atu nune’e bele kontinua halo di’ak, tanba ne’e ita hein katak fulan ida ne’e ba oin ita bele hadia fali ona irigasaun boot hodi bele fornese bee ho di’ak ba natar sira,” nia akresenta.
Entretantu, Ministru ba Ministériu Agrikultura Pekuaria Peska no Floresta (MAPPF), Marcos da Cruz hateten, governu liuhusi ministério iha ona planu atu oinsá hadia fali irigasaun sira ne’ebé hetan estragus husi mota.
“Irigasaun sira ne’ebé mak hetan estragus husi mota ne’e, ita iha ona planu atu bele hadia fali, tanba se irigasaun aat mak produsaun hare mós sei menus,” nia dehan.
Nia hatutan, atu hasa’e produsaun aihan iha rai-laran mak presiza hadia uluk pontu importante sira-ne’e.”Ita presiza hadia dunik pontu importante sira hanesan ne’e, tanba ita hanoin atu hasa’e produsaun maibé buat sira-ne’e aat hela, problema boot ida ba ita atu hasa’e produsaun aihan iha ita-nia rain,” nia afirma.
