Governu Portugal liuhusi Instituto Camões iha Timor-Leste apoiu orsamentu ho montante rihun atus-ida-haatnulu $140,000 hodi reabilita sala de aula iha eskola Ensinu Baziku Sentral (EBC) Farol, iha kapital Díli, hodi garante prosesu aprendizajen ho seguru.
Embaixadora Portugal iha Timor-Leste Manuela Bairros hateten, apoiu ne’e liuhusi MoU ne’ebé Ministériu Edukasaun no Governu Portugal halo hodi fó apoiu reabilitasaun eskola sira iha Timor-Leste.
“Governu Portugal apoiu halo reabilitasaun ba eskola refere no sala de aula hamutuk 7 hodi garante prosesu aprendizajen ho seguru ba estudante sira,” nia hatete.
Embaixadora Portugal Bairros dehan, sira apoiu reabilitasaun eskola EBC Farol, tanba konstrusaun antigu desde husi tempu portugés nian ho nune’e governu Portugal hakarak reabilita.
Nia hatete, governu Portugal prontu nafatin apoiu Ministériu Edukasaun hodi halo dezenvolvimentu ba infraestrutura eskolár iha Timor-Leste.
“Ita nafatin apoiu hodi kria kondisaun di’ak ba estudante no profesór sira iha eskola liu-liu kona-ba infraestrutura,” nia informa.
Entretantu, Ministra ba Ministériu Edukasaun (ME) Dulce de Jesus Soares dehan, reablita sala-aula iha Eskola EBC Farol, atu ajuda estudante sira hodi estuda iha ambiente ida ne’ebé seguru no protesaun.
“Lori estudante sira no profesór sira hotu nia naran, agradese ba Instituto Camões, liuhusi Embaixada Portugal, ne’ebé fó apoiu mai ita, hodi reabilita sala-aula iha Eskola EBC Farol no husu atu kuidadu fasilidade sira-ne’e hodi utiliza ba prosesu aprendizajen,” nia dehan.
Alende nia dehan, sira halo reabilitasaun de’it ba eskola kompostu husi sala de aula 7 ne’e, kona-ba fasilidade sira seluk mak ME sei kompleta.
Aleinde ne’e nia dehan, dadaun ne’e ministério mós hahú halo reabilitasaun ba sala de aula hamutuk haat-nulu-resin-rua (42) ba eskola ensinu báziku sentral ba eskola hamutuk sanulu-resin-haat (14) iha munisípiu, Baucau, Liquiçá, Ermera, Manatuto no Viqueque.
Iha fatin hanesan Diretora Eskola Ensinu Báziku Sentrál (EBC) Farol dehan, husi parte eskola presiza fasilidade no kondisaun ne’ebé di’ak ba estudante sira.
“Infraestrutura ko’alia ba mai di’ak ona, no ami presiza kartera eskolár ba estudante sira, tanba kada tinan ami sempre hasoru problema menus kadera no meza,” nia informa.
Nia dehan, depois de’it reabilitasaun ne’e remata husi parte eskola prepara ona pedidu ba ministério hodi husu kartera eskola hamutuk 300 hodi bele kompleta iha eskola.
