Sekretáriu ba Sekretariadu Estadu Peska (SEP) liuhusi Diresaun Nasional Peska (DNP) konstrui ona mini merkadu hodi fa’an ikan iha Suku Mota-Ulun, Postu-Adminitrativo Bazartete, Munisípiu Liquiçá.
“Mini merkadu ne’ebé mak governu konstroi iha Suku Mota-Ulun, Postu Adminitrativu Bazartete, Munisipiu Liquiçá ne’e, ida ne’e hanesan pilotu ida,” dehan Diretór DNP Acácio dos Santos iha knaar fatin iha Komoro, Díli.
Nia hatutan, mini merkadu refere atinji ona 70%, no konstrusaun remata sei kontinua halo fali iha munisípiu sira seluk.
“Ita konstrui mini merkadu iha suku Mota-Ulun iha tinan 2024 la konklui, maibé ita hein fulan Marsu nia laran [kompleta ona],” nia esplika.
Nia salienta, orsamentu ba konstrusaun ho montante $50,000 no inklui armajen ida atu asegura ikan ho didiak.
Iha fatin ketak, Peskadór Armado Ximenes hateten, peskadór sira presiza duni fatin faan ikan atu nune’e ajuda sira buka moris.
“Mini merkadu ne’e di’ak tebes, tanba durante ne’e ami hanesan peskadór faan ikan tuir dalan de’it, tanba fatin la iha, maibé liuhusi ajuda ne’e bele ona fasilita ami atu hodi bele buka moris,” nia dehan.
Nia hatutan, husu ba kompaña ne’ebe kaer projetu ne’e atu finaliza lalais konstrusaun ne’e, tanba merkadu foun la’ós foin mak halo, maibé halo kedas iha tinan kotuk.
Iha parte seluk, Akademista UNTL Maria dos Reis husi Fakuldade Agrikultura hateten, ida-ne’e tanba bele ajuda peskadór sira atu asegura ikan sira-nia labele at.
“Dala ruma ita hola ikan sira lori to’o mai uma iis tiha ona, tanba la iha kondisaun ne’ebé mak atu asegura ikan sira-ne’e, tanba ne’e liuhusi mini merkadu ne’e bele ajuda peskadór sira atu kuidadu sira-nia ikan labele at lalais,” nia dehan.
Nia hatutan, tuir loos mini merkadu ne’e labele halo deit iha Liquiçá.”Governu mos tenke kontrui mini merkadu ne’e iha munisípiu sira hotu labele iha deit Liquiçá, liuliu iha Munisípiu Díli, tanba ita haree ema sira ne’ebé faan ikan iha estrada ibun no tasi ibun, sira la iha fatin di’ak ba sira atu bele kuidadu ikan sira-ne’e,” nia afirma.
