Polísia Tránzitu Seguransa Rodaviáriu Nasionál aplika multa administrativu ba motorista transporte públiku mikrolete hamutuk 36, tanba la utiliza uniforme hodi halo servisu hanesan profisional motorista.
Komandante Tránzitu Seguransa Rodaviáriu Nasionál Superintendente Asistente Luis da Costa dehan, motorista transporte públiku sira obrigatóriu tenke utiliza uniforme hodi hatudu sira-nia identidade ba públiku.
“Liuhusi atividade cek poin ne’ebé ita halo espesífiku ba transporte públiku ohin, ita konsege prende no aplika multa admistrativu motorista husi mikrolete hamutuk 36,” nia dehan.
Nia haktuir, iha Lei Kódigu Estrada númeru 6/2003 mós hatur katak se de’it mak sai motorista transporte públiku hanesan mikrolet no taxi tenke utiliza uniforme hodi halo sirkulasaun tula pasajeiru, bainhira la utiliza tenke aplika multa.
Nia dehan, multa ne’ebé mak aplika tuir uniforme ne’ebé sira utiliza hanesan, uza uniforme la kompletu tenke multa $17 dolar, no la utiliza hotu tenke multa $34 dolar.
“Ita haree uniforme ne’ebé mak sira dadaun ne’e utiliza mós la merese atu utiliza ona tanba aat, nakles, balun lafase, ida-ne’e ita la tolera, sira tenke troka foun nune’e mós tenke uza kompletu uniforme sisip rapidu nune’e mós utiliza sepatu depois mak bele tula pasajeiru,” nia dehan.
Nia dehan, transporte públiku sira iha kapitál Díli ne’e tenke rapidu nomós sira ne’ebé tula pasajeiru la’ós ema nasionál de’it, maibé estranjeiru sira hotu, tanba ne’e tenke hatudu imajen ne’ebé mak di’ak.
Nia dehan, polísia sei halo kontrolu ne’ebé rigórozu ba motorista transporte públiku sira, bainhira la utiliza uniforme sei aplika multa tuir lei kódigu estrada nian.
Entretantu, motorista Graciano da Costa Fernandes dehan, nia la utiliza uniforme tanba uniforme ne’ebé nia iha aat ona no la iha osan atu suku fali uniforme foun.
“Uniforme ne’ebé ami utiliza ami suku rasik, uza ami-nia osan, osan la iha ha’u mós la’o bain-bain uza de’it faru ida nakles ne’e, maibé la hatais tau de’it iha kadera,” nia dehan.
Nia rekoñese duni katak sira sala, tanba kontra lei no prontu selu multa administrativu $34 iha banku nune’e bele foti fali karreta.
Iha parte seluk pasajeiru Mariana Sarmento dehan, motorista transporte públiku ne’e tenke utiliza sira-nia farda bainhira halo servisu nune’e bele hatudu sira-nia identidade.
“Motorista transporte públiku sira-ne’e hala’o servisu profesionál, tanba ne’e tenke hatudu sira nia identidade husi farda ne’ebé mak sira utiliza,” nia dehan.
