Ministru Ministériu Agrikultura Pekuaria Peska no Floresta (MAPPF), Marcos da Cruz husu ba guarda Floresta no xefe territoriál munisípu sira, atu halo kontrolu ba ai-horis sira no fahe informasaun ba komunidade sira atu labele estraga ai-horis sira arbiru.
“Ita orienta ona ba guarda floresta sira no xefe territoriál iha munisípiu sira, atu nune’e sira bele halo kontrola ba ai-horis sira no fahe mós informasaun ba komunidade sira atu oinsá atu bele kuidadu ai-horis sira-ne’e. Se ita la kuidadu mak sei mosu degradasaun, rai monu, bai-loron naruk rai halai,” dehan Ministru Marcos, iha salaun MAPPF, Comoro, Díli.
Nia hatutan, guarda floresta no xefe territoriál munisípiu sira-ne’e iha hotu ona transporte tanba ne’e bele uza hodi halo servisu refere.
“Ita fasilita ona transporte hanesan motorizada no radio komunikasaun ba guarda floresta no xefe territoriál munisípiu sira, atu nune’e guarda floresta sira uza hodi kontrola ba ai-horis sira. Aleinde ne’e, xefe territoriál sira uza fasilidade sira-ne’e hodi fahe informasaun ba komunidade sira iha área rurais oinsá atu bele kuidadu ai-horis sira,” nia afirma.
Iha fatin hanesan Guarda Floresta husi Munisipiu Ermera, Carlos Martins hateten durante ne’e guarda floresta sira halo servisu makaas hodi kontrola komunidade sira atu labele tesi ai arbiru.
“Ami durante ne’e halo servisu makaas hela iha área rurais sira-ne’e hodi kontrola ai-horis sira ne’e atu komunidade sira keta tesi arbiru, maibé ita hatene katak distansia área floresta ne’e luan, tanba ne’e susar ba ami atu kobre hotu fatin sira-ne’e,” nia dehan.
Nia hatutan, durante ne’e guarda floresta sira halo servisu lao ain de’it, distansia floresta luan, loron ida guarda floresta labele halo kontrola hotu ba área sira-ne’e hotu.
“Durante ami halo servisu la’o de’it la iha transporte ba ami, entaun loron ida ami atu kontrola hotu kedas ba área floresta luan boot ne’e labele. Maibé MAPPF mós komesa ona fahe transporte mai ami atu nune’e bele hodi halo kontrola ba ai-horis sira hotu,” nia afirma.
