Governu Xina apoiu Ministériu Edukasaun dezenvolve Ensinu Tékniku Vokasionál (ETV) iha Timor-Leste hodi hasa’e koñesimentu foinsa’e sira-nian iha área tékniku vokasionál.
Embaxadór Timor-Leste iha Xina, Loro Horta dehan dezenvolvimentu setór edukasaun iha Timor-Leste tenke investe iha ensinu tékniku vokasionál nune’e joven sira bele prepara an asesu ba merkadu-traballu.
“Governu Xina apoiu Ministériu Edukasaun hodi halo dezenvolvimentu no moderniza ETV iha Timor-Leste hodi prepara foinsa’e sira asesu ba kampu servisu nune’e mós kria rasik servisu ba sira-nia an,” nia dehan.
Nia hatete, apoiu iha área ETV hodi hasa’e liután foinsa’e sira-nia koñesimentu iha área tékniku vokasionál nian iha Timor-Leste.
“Iha tinan 2025 ne’e Governu Xina disponibliza ona bolsa estudu hamutuk 15 iha área tékniku vokasionál ba Timoroan sira hodi ba hala’o estudu iha Xina,” Embaxadór Horta dehan iha Ministériu Edukasaun, Vila-Verde, Díli.
Alende ne’e nia dehan, Governu Xina mós ko’alia ho Ministériu Edukasaun hodi haree posibilidade no kordena implementasaun projetu iha área tékniku vokasionál nian.
Entretantu, Ministra Ministériu Edukasaun, Dulce de Jesus Soares hatete dadaun ne’e Governu Xina apoiu ministériu hodi moderniza ensinu tékniku ko vokasionál iha Timor-Leste.
“Atu halo dezenvolvimentu setór edukasaun iha Timor-Leste ita presiza tulun husi parseiru sira, emtermos de ideia nune’e mós formasaun no ekipamentu sira,” nia dehan.
Nia dehan, agradese tebes, tanba nasaun Xina hakarak fó apoiu ba ETV iha Timor-Leste no katak ba oin koperasaun ne’e sei la’o di’ak no sei identifika nafatin buat ruma ne’ebé mak presiza atu apoiu.Enkuantu total ETV iha Timor-Leste hamutuk 32 husi Agríkola, Indústria no Mekánika, Hotelaria, no seluk tan.
