Food and Agriculture Organization of The United Nations (FAO) apoiu Ministériu Agrikultura Pekuária, Peska no Flores (MAPPF) distribui tablet atus haat (400) ba estensionista agrikultura sira iha munisípiu sanulu resin tolu (13) inklui RAEOA.
Reprezentante Parseiru internasionál FAO, Rajendra Aryal hateten, FAO fó apoiu ida-ne’e atu bele buka solusaun ba Seguransa Alimentar iha rai-laran.
“FAO distribui ekipamentu tablet hamutuk 400 ne’e ba Diretór Agrikultura sira iha munisípiu sanulu resin tolu inklui RAEOA, atu nune’e bele apoiu governu hodi buka solusaun ba Seguransa Alimentar iha rai-laran,” dehan Reprezentante FAO iha salaun enkontru MAPPF, Comoro, Díli.
Nia hatutan, Seguransa Alimentar ne’e problema ida importante tebes ba nasaun ida-ne’e, tanba ne’e FAO hakarak ajuda governu ida-ne’e hodi tau matan ba problema ne’e.
Nia salienta, era ida agora ne’e tama ona ba dijitalizasaun, tanba ne’e FAO sei tulun Ministeriu Agrikultura ba Dijitalizasaun.
“Ita agora iha ona era dijitalizasaun, tanba ne’e FAO mai iha ne’e atu bele ajuda Ministeriu Agrikultura hodi nune’e bele rekolla no fahe informasaun sira,” nia esplika.
Nia akresenta, tablet sira-ne’e fahe ba estensionista sira iha munisípiu atu nune’e bele ajuda sira, hodi dijitaliza servisu agrikola iha munisípiu sira, hodi nune’e bele rekolla informasuan sira ho lalais mairelata ba ministériu.
Sekretáriu Estadu Peskas (SEP) Domingos da Conceição dos Santos hateten, ekipamentu liuliu tablet 400 ne’e hetan ajuda husi FAO atu fahe ba estensionista sira iha Munisípiu 13 inklui Raeoa.
“Ita simu tablet 400 husi FAO hodi fahe ba estensionista sira iha munisípiu hodi halo sira nia servisu hodi foti dadus iha baze,” dehan Sekretáriu Estadu Peskas.
Nia hatutan, agradese tebese ba FAO, tanba bele ona ajuda Ministeriu Agrikultura liuliu iha sistema dijitalizasaun, hahu husi nivel nasional to baze.
