Diretór Servisu Munisípiu Bobonaro, Longuinhos João hateten, komunidade nia natar hektár atus-ida (100) iha Maliana I mak hetan estragus husi peste karakol.
“Tuir informasaun ne’ebé ha’u asesu ne’e kona-ba peste karokol estraga natar na’in sira-nia haree hamutuk hektár atus ida (100) iha Maliana I,” Dehan Diretór Agrikultura Munisípiu Bobonaro, iha salaun MAPPF, Comoro, Díli.
Nia hatutan, Iha Maliana II iha tinan hirak kotuk peste karokol estraga natar maka’as tebes, maibé iha Memo peste karokol ladun estraga natar.
“Iha tinan kotuk peste karakol estraga komunidade Maliana II sira-nia hare lubuk ida, maibé iha Memo peste karokol ladun estraga, iha tinan ida-ne’e peste karakol estraga fali iha Maliana I. Ami nafatin uza aimoruk iha epoka ida ba epoka ida kuandu hetan ataka husi peste karokol,” nia esplika.
Nia hatutan, enkuantu Peste Karokol ataka komunidade sira-nia hare iha fulan Janeiru nia laran, agora dadaun kontinua estraga hela, tanba ne’e distribui ona ai-moruk ba komunidade sira hodi halo Prevensaun.
“Lo’os duni, ita deskobre iha área lubuk ida hetan estragu husi karokol mak hanesan iha Suku raipu’u, Ritabou , Laho Mean no suku Odomau, tanba ne’e ita halo ona Prevensaun ho modelu barak no ikus liu uza ai-moruk kimiku sira hodi halo Prevensaun,” Nia reafirma
Nia salienta, antes ne’e orienta ona ba natar na’in sira hodi redus bee la bele nalihun, no karokol ne’e barak atu halo prevensaun fisiku liuhusi rekolla tiha tau hamutuk fatin ida depois mak destroi.
Nia akresenta, karik karokol ne’e barak demais entaun tenke uza kimiku ne’ebé foin lalais ne’e halo ona intervensaun husi Ministériu Agrikultura, Pekuaria, Peska no Floresta (MAPPF).
Iha parte seluk, Komunidade husi Maliana I Suku Ritabou Maria do Santos Leita hateten, tinan ida-ne’e natar hotu-hotu iha Suku Ritabou maioria mak hetan estragus husi peste karakol.
“Ami-nia natar iha Suku Ritabou ne’e maioria mak hetan estragus husi peste karokol.” nia dehan.
Nia haktuir, iha tinan kotuk karakol la estragus, maibé tinan ida-ne’e karakol estraga hotu, sira uza aimoruk mak rega mós la mate, oho mós la bele.
