Ezisténsia Asosiasaun Juventude Edukativu (AJE) nu’udar inisiativa husi joven sira hodi tulun joven sira-ne’ebé hakarak aumenta koñesimentu liuhusi kursu sira.
Prezidente AJE Adão Soares Martins hatete, hanesan mós joven ida inisiativa harii asosiasaun refere hodi fasilita maluk joven sira liuhusi formasaun.
“Inisiativa harii grupu ida-ne’e husi ami-nain hirak ne’ebé sempre hamutuk hodi hanoin katak nu’udar joven ida ita presiza harii grupu hodi fahe mós ita-nia matenek ba maluk sira-ne’ebé presiza no aumezmu ita mós bele kadi nafatin siénsia ne’ebé iha, ho ida-ne’e maka ami hanaran Asosiasaun Juventude Edukativu (AJE).
AJE ne’e rasik eziste foku ba assuntu edukasaun liuliu realiza formasaun sira hodi tulun malu joven sira,” Dehan Prezidente AJE Adão.
Nia akresenta, objetivu husi Organizasaun AJE atu eleva joven sira-nia koñesimentu hodi prepara ba futuru.
“Ami -nia foku ba formasaun sira hanesan Public Speaking, Lideransa, Polítika no Jornalizmu Baziku, organizasaun ne’e ho objetivu atu hasae maluk joven sira-nia Koñesimentu no abilidade hodi sai joven preparadu no serve ba futuru,” tenik nia.
Aleinde ne’e Vadtrizya Aprilya Amaral atuál estudante iha Departamentu Siénsia Polítika, Fakuldade Siénsias Sosiais-UNTL hatete, orgullu bele sai mós membru iha organizasaun AJE, tanba aprende siénsia barak.
“Ha’u hanesan mós membru ida iha organizasaun AJE ne’e, sente kontenti tebes, tanba liuhusi organizasaun ne’e bele hanorin oinsá fahe ideia ba malu no aprende siénsia sira-ne’ebé mai husi diferenseáreia sira.
Liuhosi organizasaun ne’e mós ha’u bele hetan oportunidade atu organiza, fahe tempu ba formasaun hodi kadi nafatin matenek ne’ebé ha’u iha no bele halo ha’u iha tebes vontade hodi nafatin aprendenune’e prepara ha’u-nia an ba futuru,” Dehan Nia.Nia hatutan, oportunidade sira-ne’ebé nia hetan hanesan buat foun ida, maibé hanesan joven ida tenki simu ho responsabilidade, tanba Timor-Leste nia dezenvolvimentu iha futuru presiza jerasaun foun.
