Ministériu Transporte no Komunikasaun (MTK) konstrui on a halte ne’ebé públiku bele asesu hodi hein no sa’e transporte públiku hamutuk sanulu (10) iha kapitál Díli.
Diretór Nasionál Aprovizionamentu iha (MTK) Pascoal Couto de Jesus dehan, halte sanulu (10) ne’ebé konstrui ne’e hodi fasilita komunidade ne’ebé movimentu ho transporte públiku iha kapitál Díli tenkehein, sa’e no tun iha halte ne’ebé prepara ona no sei la autoriza para fali iha fatin seluk nune’e labele hamosu engrafamentu.
“Ita konstrui ona halte hamutuk sanulu (10) iha dalan públiku sira iha kapitál Díli hodi fasilita komunidade sira bele hein, sa’e no tun iha halte hirak ne’e,” nia dehan.
Nia dehan, halte hirak ne’e konstrui iha área Comoro Timor Plaza, Ai-Mutin, Bairu-Pite, Vila-Verde gruta oin, Ministériu Solidariedade Sosiál no Inkluzaun Sosiál oin, Matadouru, Vila-Verde Igreja Catedral sorin, Kaikoli Postu Polísia nian, no iha Diresaun Nasionál Transporte Terrestre oin.
“Halte ne’e konstrui husi ita-nia Empreza Carisma Unipesoal Lda, no orsamentu ba konstrusaun ne’e hamutuk $96.956,” nia dehan.
Nia dehan, halte ne’e sei finaliza iha fulan Abril hodi entrega ba governu bele utiliza.
Entretantu Jestor Empreza Carisma Unipesoal Lda Felizito Chang hatete, halte ba transporte públiku dadaun ne’e konstrusaun atinje ona 35%.
“Dadaun ne’e ita sei hein sasan halte nian to’o mai Timor mak ita monta, tanba sasan balun iha Timor-Leste laiha,” nia informa.
Nia hatete, sasan ne’ebé iha Timor-Leste laiha no hein husi rai-liur, ne’e mak hanesan, kaca mika 10mm, Acp 4mm, ho guilding block, bainhira sasan hirak ne’e mai monta ba finaliza ona.
Enkuantu halte antigu ne’e mak konstrui iha tempu Indonézia hamutuk 16 iha kapitál Díli.
