Diretór Ezekutivu Fundasaun Mahein (FM) Mahein Nelson Belo dehan, governu liu-liu Ministériu Interior presiza konstrui tan postu ba Unidade Patrolhamento Fronteira (UPF) hodi hafasil kontrolu no halo prevensaun ba atividade ilegál iha fronteira.
Nia dehan, atividade ilegál ne’ebé mak sempre akontese iha área fronteriza Timor-Leste no Indonesia nian ne’e, tanba distánsia husi postu ida ba postu seluk dook tebes no difisil tebes ba UPF atu kontrolu.
Nia hatutan, dalan ilegál iha fronteira hahú husi Covalima, Bobonaro to’o Oecusse ne’e hamutuk 78, área hirak ne’e distánsia luan tebes, husi postu ida ba postu seluk tenke la’o sa’e foho tun foho mak foin to’o, tanba ne’e mak fasil loos ba sidadaun sira hodi halo atividade ilegál.
“Ita husu governu liu-liu Ministériu Interior presiza aumenta tan postu ba Unidade Polisia Fronteira (UPF) nune’e bele hafasil sira kontrolu atividade ilegál,” Diretór Ezekutivu FM Belo hatete.
Nia hatete, atu halo prevensaun ba atividade kontra-bandu iha fronteira governu presiza investe liuhusi infraestrutura, aumenta pesoal UPF nian no kompleta ekipamentu modernu hodi kontrolu ema nia movimentu tama-sai iha fronteira.
“Ita husu mós ba governu atu tau osan hodi moderniza sistema kontrolu iha fronteira hodi bele hafasil Unidade Patrolhamento Fronteira (UPF) nia servisu, bainhira ita koalia deit ita sei la rezolve buat ida,” nia husu.
Tanba ne’e nia dehan, tuir sira nia monitorizasaun durante ne’e Polisia Nasional Timor-Leste (PNTL) liuhusi Unidade Patrolhamento Fronteira (UPF) durante ne’e halo servisu di’ak tebs liu-liu kona-ba prevensaun atividadeillegal, maibé fasilidade mak la sufisiente.
Entretantu Asesor Koordenadór Engeñeiru Ministériu Interior João Nunes do Santos dehan, projetu konstrusaun ba postu UPF dadaun ne’e la’o hela.
“Ita konstrui tan postu hamutuk 47 kompostu husi Munisípiu Covalima, Bobonaro, no Oecusse dadun ne’e konstrusaun la’o ona, postu hirak ne’e konstrui iha entre postu hirak ne’ebé mak identifika distánsia dook malu,” nia saliente.
Nia dehan, konstrusaun ba postu 47 ne’e sei finaliza iha fulan outubru tinan (2024) ne’e no sei kompleta ho fasilidade, eletrisidade, bee moos, haris-fatin dapur no kama atu nune’e membru UPF ne’ebé mak destaka iha postu refere hodi utiliza.
