Instituto Nacional Desenvolvimento Mão de Obra (INDIMO) fó ona lisensamentu ba sentru formasaun profisional hamutuk 11 hodi halo atividade formasaun no kapasitasaun ba joven sira asesu ba merkadu-traballu.
Diretora INDIMO Isabel Fernandes de Lima dehan, sentru formasaun 11 ne’ebé mak INDIMO fó lisensa ne’e eziste kleur ona no produz ona joven barak mak asesu ba traballu no baluk kria rasik servisu no fó servisu ba ema seluk.
Tanba ne’e nia dehan, fó lisensamentu ne’e mós, liuhusi prosesu avaliasaun ho hatudu katak sentru formasaun hirak ne’e nia kualifikadu di’ak iha nivel nasional, tanba ne’e INDIMO fó akreditasaun hodi halo sira-nia atividade formasaun.
“Ita fó lisensamentu ba sentru formasaun profisional 11 ne’e hodi halo atividade formasaun hodi prepara ita-nia joven sira asesu ba merkadu-traballu,” nia hatete.
Nia dehan, sentru formasaun profisional 11 ne’ebé INDIMO akredita ona ne’e mak, Sentru Nasional Formasaun Profisonal (SENAI) Bekora, Fundasaun CICANADA-STVJ, Sentru Formasaun Integral Joven Kriansa Manatuto (CFIJC), Vizaun Foinsa’e Díli, Canossian Vocational Training Center Covalima, no Asosiasaun hanesan, AHISAUN, Fundasaun Hadomi Timor, Ermera Ai-Kulat Mutin Orgánika, Fundasaun Haburas Lian Corea Timor-Leste no seluk tan.
“Sentru Formasaun Profisional hirak ne’e ita akredita no atribui sentrifikadu apresiasaun, tanba durante ne’e sira produz ona joven barak asesu ba kampu traballu, iha rai-liur no rai-laran,” Diretóra INDIMO Fernandes dehan.
Tanba ne’e nia husu ba sentru formasaun profisional hirak ne’e atu kontinua halo sira-nia atividade hodi prepara joven sira ho di’ak liu hodi kompete ba servisu nune’e mós kria rasik servisu.
Enkuantu akreditasaun ba sentru formasaun profesional hirak ne’e bazeia ba dekretu lei númeru 8/2008 hodi fó aprovasaun ba sentru formasaun profisional sira hodi implementa sira-nia atividade profisional iha rai-laran.
Iha fatin hanesan, Madre Canosiana Maria Filomena Freitas husi CFIJC (Sentru Formasaun Integrál Joven Kreativu) dehan, orgullu tebes tanba sira bele hetan ona akreditasaun husi governu hodi halo sira-nia atividade formasaun ba joven sira.
“Durante ne’e ami husi CFIJC esforsu makas hodi bele hetan akreditasaun, maibé ohin ami konsege realiza ami-nia esforsu hodi hetan konfiansa husi governu hodi kontinua ami-nia atividade,” nia hatete.
Enkuantu nia dehan, atividade ne’ebé mak durante ne’e sira halo mak hanesan, formasaun iha área ospitalidade, otelária, suku hena ho mákina, língua Ingleza, Português no seluk tan.
