Membru Parlamentu Nasional, Deputado Aniceto Guterres konsidera situasaun Timor-Leste frajil tebes intermus kapasidade atu responde surtu pandemia virus corona (COVID-2019) tanba ne’e iha posibilidade bo’ot atu Timor-Leste adopta estrategia lock down.
Nia dehan nasaun barak foti ona desizaun adopta estrategia taka pontu entrada (lock down) hanesan meius atu prevene no kontrola virus corona iha rai laran.
“Ita rekunhese ita nia situasaun ne’ebe frajil, liu-liu fronteira sira no kapasidade naton deit. Konserteja virus ne’e sei mai entaun to’o momentu ida ita mos tenke to’o iha estrategia ida lock down ne’e,” nia hateten iha plenaria Parlamentu Nasional foin lalais ne’e.
Nia dehan estrategia lock down ne’e sei fo mos impaktu ba iha ekonomia nasional tanba ne’e governu tenke tetu no hare maneira sira ne’ebe diak liu atu bele responde ba situasaun ida ne’e.
Entretantu, Deputada Maria Angelica Rangel preokupa ho situasaun ida ne’e tanba nasaun barak inklui Indonesia foti ona desizaun bainhira kazu aumenta iha posibilidade taka odamatan fronteira.
“Se nasaun sira taka odamatan entrada, ita nia stok aihan iha ga lae tanba ita nia dependensia bo’ot durante tinan 10 resin ita gasta osan barak la produs depende deit ba nasaun sira hanesan Indonesia no seluk tan,” nia preokupa.
Hatan ba kestaun ida ne’e, Ministra Saúde Interina Elia Antonia Amaral hateten nasaun balun foti ona desizaun atu lock down no kuarentina obrigatorio ba pasaseiru sira husi nasaun afetado.
Nia dehan Timor seidauk iha kazu positivu ba COVID-2019, maibe iha planu kontinjensia ne’ebe rekomenda husi Organizasaun Mundial Saude (OMS) katak bainhira iha kazu positivu ida maka opsaun ne’ebe sei foti maka kuarentina obrigatorio iha uma ba ema ne’ebe mai Timor liu husi nasaun afetado no segundu kuarentina obritagorio iha uma ba ema hotu ne’ebe tama iha pontu entrada.
“Kazu konfirmadu positivu ida ka liu ida maka opsaun ne’ebe ita foti bandu entrada ba ema ne’ebe mai husi ka liu husi nasaun afeitado no izola (lock down) munisipio relevante, depende ba iha rezultado vizilansia epidemiologia, maibe bainhira kazu liu husi rua maka sei taka porta entrada no izola fatin publiku sira hanesan eskola no atividade servisu sira,” nia hateten.
Nia dehan governu halo esforsu tomak atu asegura sidadaun hotu protejidu husi virus corona (COVID-2019), ne’ebe sai ameasa ba mundu.
