Polisia Nasional Timor-Leste (PNTL) rekonhese dadaun ne’e posto polisia iha Dili laran sei menus atu assegura seguransa iha tempo kalan, tanba PNTL menus pesoal hodi koloka iha posto polisia.
“Kada posto ida ita tenke koloka ema nain 6 ba leten. Ida ne’e susar tanba ita menus pesoal, dadaun ne’e ita koloka maibe nain 2 deit ba loron nia, kalan la iha tanba sira tenke halo patrulha,” dehan Komandante Operasaun Nasional PNTL, Superientendente Xefe Pedro Belo.
Nia dehan, polisia serviso iha posto tempo kalan dadun ne’e iha maibe sei menus tanba, pesoal mos menus no iha tempo kalan sira tenke halo patrulha no mos cek point no sira labele metin deit iha posto.
“Ita nia pesoal polisia menus. Ema ida bele halo serviso rua tolu exemplo hanesan OPS, nia tenke mai hotu iha eskuadra hodi halo serviso seluk hanesan investigasaun no mos patrulha,” Komandante Superientendente Xefe Pedro Belo hateten.
Maibe nia dehan, maske PNTL menus pesoal hodi koloka iha posto maibe garante katak seguransa ba populasaun sira lao nafatin, no nia apelu ba komunidade sira ne’ebe movimento iha tempo kalan atu keta tauk tanba polisia nafatin asegura.
“Maske ami la destaka iha posto polisia iha tempo kalan maibe ami iha maneira seluk ne’ebe mak ami uza hodi garante seguransa ba komunidade iha tempo kalan maibe ne’e segredo ami nian,” Superientendente Xefe Pedro Belo hateten.
Nia dehan, ho prezensa ofisial polisia suku (OPS), Konselho Polisiamento Komunitario (KPK) serviso hamutuk ho xefe suku sira, kolabora hamutuk oinsa halo jestaun hodi garante seguransa iha suku laran.
Entertanto Diretor Ezekutivo Fundasaun Mahein (FM), Joao Almeida hateten, posto polisia sira iha Dili laran ne’e maluk balun funsiona iha tempo balun nia laran deit, 24 oras ne’e la iha.
“Ita hare iha tempo kalan ne’e movimento komunidade ne’e barak maibe iha posto polisia sira ne’e pesoal seguransa sira la iha fatin hodi garante seguransa,” FM Joao Almeida hateten.
Tanba ne’e nia dehan tenke utiliza posto sira ne’e ho diak tuir duni nesesidade polisial nian, hodi garante seguransa iha Dili laran.
“Atu garante seguransa iha capital Dili ne’e posto polisia sira iha Dili laran tenke uza halo aktividade polisial nian 24 oras nune’e komunidade bele la’o livre,” nia hateten.
Nia salienta tan katak tenke koloka membro sira iha posto polisia sira ne’e no tenke halo rotasaun, nune’e balun serviso iha loron, balun kalan, nune’e labele falta prezensa polisia nian iha posto sira.
