Liu husi atividades jornada da paz ba elisaun antesipada, Prezidente da Republika Francisco Guterres Lu-Olo apela ba lider partidu politiku sira no povu tomak atu hametin paz no estabilidade iha rai laran, tanba ida ne’e mak nasaun presiza agora.
Nia dehan, esperiensia ne’ebe Timor –Leste iha durante iha okupasaun sira hatudu, katak paz susar tebes atu konkista no fasil mos atu lakon, maibe sosiedade hamutuk ho igreja fo liman ba malu hamutuk iha situasaun todan sira to’o ohin loron povu hetan ona paz.
Nia hateten, bainhira iha nasaun ida funu laiha, lasignifika povu moris iha dame nia laran tanba dame mai husi ema ida –ida nia fuan laran.
Nia hatutan, murak ne’ebe diak liu nudar Timor oan mak tenke fo liman ba malu hametin paz iha rai laran.
“Hau husu ba imi hotu, lider sira no ba povu tomak, mai ita hametin paz, tane aas nafatin harmonia entre Timor oan sira hotu, keta husik estraga ita nia nasaun ho razaun ne’ebe deit, tanba prezidente sei la premite ida ne’e, maibe hamutuk ho imi, ita hametin paz no dame iha ita nia rain,” nia apela iha Lecidere, Dili.
Nia agradese, ba igreja Katolika no religiaun sira seluk ne’ebe nafatin fo atensaun ba harii paz no domin iha rai laran, hahu iha tinan todan sira liu –liu tempu okupasaun.
Entretantu, reprezentante Partido Koligasaun Partidaria AMP Azevedo Marçal hateten partido sira nia servisu remata ona iha kampanha, agora desizaun iha povu atu determina liu husi elisaun.
“Mai ita fo liman ba malu, hametin paz atu hatudu ba nasuan seluk katak ita unidade no maduru ona iha vida demokrasia, ho ida ne’e ita sei sai ezemplu ba nasaun seluk,” nia hateten.
Nia dehan, partidu bele diferente tanba konstituisaun fo dalan maibe intensaun ida deit mak Timor ida ne’ebe diak liu, metin no buras ba Timor oan hotu.
Enkuantu, Reprezentante partido FRETILIN Mateus Boavida hateten sira pronto atu asegura paz no estabilidade iha rai laran.
“Paz no dame iha Timor –Leste konta ho FRETILIN tanba FRETILIN mak imi, ita hamutuk haburas Timor –Leste ida ne’ebe buras liu,” nia hateten.
Iha sorin seluk, reprezentante Partido Demokratiku (PD) Antonio da Conçeicão kongratula maturidade povu Timor –Leste nian no agradese ba apoiu tomak povu nian iha atividade kampanha ne’ebe remata ho hakmatek.
“PD promete iha fatin ida ne’e, atu sai instrumentu da paz, ami sei la insita nein promove, maibe ami hakarak sai deit instrumentu ida ne’ebe atu satan saida deit mak atu halo rain ida ne’e fila ba kotuk,” nia hateten.
Iha oportunidade ne’e, reprezentante partidus politiku hotu hato’o agradesementu ba Igreja Katolika ne’ebe hola inisiativa hamosu “Jornada da Paz” Elisaun Antisipada hodi fo oportunidade ba partidu politiku sira hato’o mensagen paz no dame ba povu tomak.
