Bazea ba monitorizasaun husi Provedoria ba Direitus Humanus e Justisa (PDHJ) ba atividade kampanha, identifika katak funsiunariu publiku (FP) nain 10 mak abandona servisu estadu nian hodi ba tuir fali kampanha eleitoral.
Adjunto PDHJ, Horacio de Almeida hateten funsionario publiku sira ne’e laiha admite no monitor sira hetan sira tuir atividade kampanha ba elisaun antesipada nian.
“Ami identifika funsionario publiku nain 10 laiha admite no ba tuir kampanha e ami sei halo cross cek lolos sira ne’e husi ministerio ne’ebe,” nia hateten iha Dili.
Tuir nia, funsionario publiku labele abandona sira nia serviso tanba sira hanesan makina do estado, tenke halo serviso iha oras ualu nia laran iha loron ida.
Tanba ne’e, nia dehan sira ne’e sei prosesa tuir lei funsaun publiku nian numero 8/2004, ne’ebe bando funsionario publiku sira abandona serviso.
Portantu sira ne’ebe hetan lista husi Komisaun Funsaun Publiku ho vensimentu, nia dehan ne’e hamutuk 65, foti lisensa sem vensimentu ba tuir kampanha iha 17, total iha 82 e husi numeru ne’e, feto nain 15 no mane 67.
“Ida ne’ebe mak seidauk admite, ami nia monitor sira hetan iha terenu hamutuk nain 10, maibe ami sei komunika nafatin ho komisaun funsaun publiku, autoridade lokal munisipio sira hodi identifika lolos,” nia dehan.
Entretanto Komisaun ba Asunto Disiplinar iha Comisaun Funsaun Publiku (KFP), Komisariu Antonio Freitas hateten funsionario ne’ebe mak la tama sira nia lisensa, ida ne’e konsidera irregularidade, tenke submete ba prosesu disiplinar.
Maibe, nia dehan to’o agora sira seidauk simu relatorio final husi observasaun direita no indireita husi parte orgaun fiskalizador hanesan PDHJ seidauk intrega retalorio eskrita.
“Bai-bain PDHJ sempre haruka relatori mai kona ba funsionariu sira ne’ebe demite, ho komete ba aktus irregularidade hanesan abandona serviso partisipa iha kampanha, sira enkaminha mai hodi ami prosesa,” nia hateten.
Nia dehan, iha kampanha tinan kotuk (2017) ne’e kuaze 72 funsionario husi 12 munisipios inklui mos Rejiaun Administrativu Espesial Oe-Cuse-Ambeno (RAEOA), tama ona ba prosesu investigsaun para atu toma desizaun final.
“Agora mos iha tan, entaun tenke prosesu,” nia dehan
Nia dehan, iha estatutu funsaun publiku lei numero, 5/2009 mensiona kona ba kategorisa especial hanesan lisensa sira nian.
“Normalmente, funsionario sira bele uza sira nia direito lisensa anual bele ba tuir kampanha, balun bele lisensa to’o tinan ida, no lisensa ho vensimento, sem vensimento,nia bele ezerse nia funsaun,” nia hateten.
Nia fo ezemplo, hanesan lisensa sem vensimento ba halo nia atividade seluk hanesan iha tempo kampanha, ne’e nia bele tuir, ida ne’e la problema.
Nia dehan, ba funsiunariu ba-bain nia tenke aprezenta lisensa ho vensimentu, maibe ba sira ne’ebe tama lista iha kandidatura Parlamentu nian aprezenta lisensa sem vensimentu ba tuir kampanha e depois de kampanha sira bele tama fali tanba lei fo dalan.
Maibe ba sira ne’ebe mak la aprezenta lisensa, nia dehan normalmente tenke prosesa, prosesu disiplinar ou pre-eliminariu investigasaun.
“Gabinete inspesaun auditorial mak halo iha Komisaun Funsaun Publiku, ne’ebe mak hetan despaixo husi komisario asunto diciplinar nian,” nia dehan.
Maibe, nia dehan kuando nia infrasaun ne’e todan, hanesan nia ba halo kampanha laiha lisensa, ne’e tuir rutina disiplinar, nia tenke submete ba prosesu investigasaun.
“Todan liu mak demisaun, kma’an mak reparasan eskrita,” nia hateten.
Iha sorin seluk komunidade Arsenio da Silva hateten funsionario publiku labele abandona sira nia serviso hodi ba halo fali atividade seluk.
“Sekarik sira kontra, tenke prosesa tuir lei funsaun publika ne’ebe iha,” nia hateten.
