Diretor Edukasaun munisipiu Bobonaro, Alcino Barreto Joao hateten programa merenda eskolar iha eskola ensino baziku sira ate agora seidauk la’o tanba laiha orsamentu.
“Ami hato’o ona pedido ba prezidente autoridade Bobonaro atu bele aprova , atu nune’e elisaun liu tiha ita bele implementa ona merenda eskolar,” nia hateten via telefone.
Nia dehan, fos iha maibe orsamentu mak laiha, tanba kada estudantes hetan sentavus 25 e osan ne’e la fo sira direitamente, maibe tau hamutuk hodi sosa modo ba merenda ne’e.
“To’o agora iha munisipio Bobonaro merenda eskolar seidauk la’o tanba la iha orsamento,” nia dehan.
Maibe nia dehan, pedidu sira aprezenta ona ba prezidente autoridade munisipio par abele aprova.
“Pedidu iha ona autoridade munisipio e bele haruka ona ba Ministerio Finansas atu bele haree para haruka osan mai atu itabele implementa ona merenda eskolar,” nia dehan.
Entretanto hatan ba kestaun ne’e, Diretor Nasional Aksaun Sosial Eskolar, Belchior Maria Almeda Barrus hateten, programa merenda eskolar tuir lolos la’o hotu ona, maibe governo laiha orsamento.
“Ita uza deit orsamento duadesimo, ne’e ita reflete husi orsamento 2016 nian hodi halo programa sira ne’e,” nia hateten.
Nia dehan, kada fulan sira implementa programa ne’e liu husi orsamento duadesimo.
“Orsamento duadesimo ne’ebe mak ita konsentra ona ba munisipio sira la’o, maibe osan ba merenda eskolar ne’e la to’o fulan ida, uza deit iha loron 11 hanesan ne’e.
