Konselho Imprensa (KI) kontinua halo sensibilizasaun no edukasaun (media literasia) ba publiku kona ba servisus no knar meius komunikasaun nian iha prosesu dezenvolvimentu nasaun nian ba publiku no instituisaun estado sira.
Prezidente Konselho Imprensa, Virgilio da Silva Guterres hateten sensibilizasaun ida ne’e hahu ona no sei kontinua tanba publiku seidauk intende didiak servisu meius komunikasaun social nian durante ne’e.
Nia dehan, tinan ida ne’e sira registu kazu impedimentu no diskriminasaun ne’ebe membru instituisaun halo hasoru jornalista sira iha terenu, hanesan iha loron 8 fulan Janeiru, membru Polisia Tranzitu bandu jornalista sira halo kobertura ba atividade chek point ne’ebe sira hala’o no kazu seluk ne’ebe akontese iha Aero Portu no edifisio publiku sira seluk.
“Violasaun hirak ne’e sei akontese, bele dehan publiku presiza intende kona ba papel meius komunikasaun social nian no ita nia politiku sira mos tenke fo asesu ba jornalista sira atu hetan informasaun,” nia hateten, iha ambitu selebrasaun loron mundial liberdade emprensa (3 Maio) ba dala 25 ne’ebe ho tema internasional “Tempu ba lia los, tempu ba liberdade imprensa” iha Dili.
Nia informa, KI halo ona koperasaun ho instituisaun estado nian rua, hanesan Polisia Nasional Timor –Leste (PNTL) no F-FDTL, ho objetivu atu sensibiliza informasaun ba membru sira kona ba knar jornalistas nian no sensibiliza mos ba jornalista sira kona ba knar PNTL no FFDTL nian atu bele intende malu iha terenu.
Iha parte seluk, Prezidente Asosiasaun Jornalista Timor –Leste David Hugo hateten asosiasaun sei esforsu luta kontra diskriminasaun no violasaun agresaun fiziku ne’ebe hasoru jornalista liu husi edukasaun sensibilizasaun sira kona ba knar orgaun komunikasaun nian.
Nia dehan, ohin loron mosu fenomena foun ida ne’ebe fo ameasa ba produtu jornalista sira nian. Fenomena foun ne’e mak infrormasaun falsu sira (hoax).
“Ita tenke esforsu maka’as liu tan hodi luta kombate informasaun falsu sira, atu ita nia publiku bele asesu informasaun ne’ebe loos no kualidade,” nia hateten
Nia hateten, asosiasaun kontra maka’as intervensaun sira ne’ebe akontese iha orgaun meius komunikasaun social sira, liu –liu iha sala redasaun sira tanba afeita ba independensia orgaun komunikasaun sira nian ba servisu lor-loron.
