Atleta nasional Romenio de Deus sai vensedor melhor (pemecah rekor) iha eventu Dili Marathon International tinan 2017, tanba kategoria full marathon 42 km atleta Romenio tama iha garis finish ho 2h: 26 konsege halakon atleta Stephen husi Kenya ne’ebe tama ho 2h:33.
Sekretario Estado Joventude e Desportu (SEJD), Leovigildo da Costa Hornai kongratula atleta nasional tanba hatudu prestasaun ne’ebe diak tebes iha eventu desportivu international ne’e.
Nia husu, ba komisaun organizador no federasaun atu sertifika atleta Romenio de Deus ho record ne’ebe iha sai hanesan referensia ida hodi ba tuir eventu internasional sira iha futuru mai.
“Labele kaben sedu, imi tenke treinu maka’as no beibeik atu hadia imi nia record,”nia apela ba atleta sira iha Palacio Govenru, Dili.
Nia dehan, iha eventu internasional rua mak Timor –Leste sei partisipa iha tinan ida ne’e iha Indonesia no tinan 2020 iha Japaun.
Entretantu, Prezidente Federasaun Atletismo Timor –Leste Afriano Amaral hateten iha Dili Marathon International ne’e atleta Romenio de Deus halo record foun ba Timor –Leste.
“Ita nia atleta Romenio de Deus halo record foun ba Timor –Leste, ne’ebe dura ba tinan 10 mai,” nia hateten.
Nia informa, iha tinan 2009, atleta Agusto Ramos tuir eventu iha Laos sai vensedor ho 2h:30 no informasaun husi Kuala Lumpur juara I emas Marathon tama iha garis finish ho 2h:30, agora atleta Romenio halo record foun ho 2h:26.
Iha parte seluk, treinadora Odete Belo husu governu atu tau atensaun diak liu tan ba atleta sira liu –liu alimentasaun, tanba kondisaun no nutrisaun ne’e importante tebes atu fo forsa ba atleta sira.
Nia dehan, atleta selesionado ba Dili Marathon mai hela iha Dili semana ida, maibe alimentasaun ladun diak tanba loron ida atleta sira han dala ida deit no ema ida bee aqua ida.
“Ami dehan laiha buat ida tanba kondisaun mak ne’e, maibe importante ita hatudu iha kompetisaun no ikus mai hetan melhor record,” nia hatutan.
Hanesan treinadora, nafatin enkoraja atleta sira atu esforsu an treinu hodi bele lori Timor –Leste nia naran ba iha mundu liu husi talent ne’ebe sira iha, maske Timor –Leste sei iha limitasaun.
