Atletas no treinador nasional konsidera Komisaun Organizadora (KO) iha eventu desportivu internasional Dili Marathon Internasional kestiona rezultadu eventu ne’e tanba lolos atleta nasional mak tama uluk linha finais ba full marathon, maibe la tau sira hanesan primeiru lugar internasional.
Treinadora Odete Belo hateten lolos ne’e atleta nasional mak kaer hotu primeiru lugar nasional no internaisonal, maibe bainhira fahe premiu, KO bolu atleta internasional (Kenya) mak nudar juara I internasional iha eventu ne’e.
Nia hateten, iha eventu ne’e atletas nasional konsege halakon internasional hodi tama uluk iha lina finais nian no sai vensedor iha eventu ne’e.
“Hau la kontente ho premiu ne’ebe sira fahe ba hau nia atleta tanba hau nia atleta mane no feto tama iha primeiru lugar no konsege hatun atleta husi Kenya, maibe hau nia atleta rua ne’e simu deit national nian international sira rua la simu, entau ami nia direitu fo fali ba sira,” nia hateten hafoin simu premiu, iha palacio Governu oin.
Nia dehan, eventu Dili marathon ne’e eventu internasional tanba ne’e atleta nasional sira mos bele tama iha kategoria internasional, la’os nasional deit.
Nia preokupa, tanba iha prosesu selesaun laiha esplikasaun ida klaru kona ba kategoria sira ne’e, maibe ikus mai mosu fali kategoria nasional no internasional bazeia ba nasionalidade.
Nia hatutan, lolos eventu internasional atleta ne’ebe tama iha lina ikus (finish line) primeiru, nia iha direitu tomak atu hetan premiu nasional no internasional, la’os atleta internasional ne’ebe tama ikus hetan hotu premiu primeiru lugar ba kategoria internasional.
Ho defisensia ida ne’e, nia konsidera komisaun organizador ba eventu Dili International Marathona 2017 tenki klarifika, tanba ne’e nia sujere atu tinan oin mai intrega prosesu tomak ba iha federasaun atletismu hodi organiza.
Entretantu, Prezidente Federasaun Atletismu Timor –Leste Afriano Amaral rekonese failansu ida ne’e, tanba falta koordenasaun diak entre komisaun no federasaun.
Nia dehan, eventu Dili Marathon Internasional tinan ne’e federasaun nia pozisaun suporta tekniku no halo selesaun ba iha atleta sira, maibe kestaun seluk ne’e komisaun organizadora mak haree.
Nia hatutan, Dili Marathon International tinan ne’e ho kategoria full marathon 42 km atleta nain 10, kompostu husi feto lima no mane lima no meia marathon ho 21 km atleta national nain 10, kompostu husi feto lima, mane lima.
“Temi ona internasional ne’e, ita nia atleta labele iha deit nasional, ida ne’e mak prejudika atleta sira, maibe ami labele tama to’o iha ne’eba,” nia hateten.
Nia hateten, tinan kotuk atleta ne’ebe sai vensedor (pemecah rekor) hetan premiu $6 mil (premiu pemecah rekor nian), e tinan ida ne’e laiha.
Iha parte seluk Kordenador KO ba eventu Dili Marathon Internasional Johnny Guterres hateten sira iha kategoria rua ba full no meia marathon.
Nia hatutan, kategoria ne’ebe iha mak international no nasional signifika katak internasional ba atleta estrangeirus no nasional ba atleta Timor nian.
“Ami hamutuk ho federasaun sei haree ida ne’e atu fo restifikasaun ida ba atleta melhor (pemecah rekor),” nia hateten.
Nia informa, total atleta ne’ebe partisipa iha full marathon ho 42 km no meia marathon ho 21 km atleta nasional no international hamutuk 100 resin.
Tuir observasaun Jornalista TDW nian iha terenu haree, katak vensedor ba full marathon 42 km kategoria feto primeiru lugar hetan husi atleta nasional Nelia Martins ho oras 3h:10, segundu atleta Fereira Patricia husi Portugal ho oras 3h:20 no terseiru atleta nasional Hermelinda 3h: 39.
Ba kategoria mane: primeiru lugar hetan husi atleta nasional Romenio de Deus ho 2h:26, segundu lugar atleta Stephen husi Kenya ho 2h:33 no terseiru lugar atleta nasional Jeferino Guterres ho 2h:43.
Alende ne’e, meia marathon 21 km kategoria feto primeiru lugar hetan husi atleta nasional Rubia Martins ho 1h: 24, segundu lugar atleta nasional Marquita dos Santos ho 1h:34 no terseiru lugar atleta nasional Albertina da Costa ho 1h:35.
No ba kategoria mane: primeiru lugar hetan husi atleta Samson husi Kenya ho 1h:10, segundu lugar atleta nasional Felizberto Maia ho 1h:11 no terseiru lugar atleta nasionla Rosalino ho 1h:17.
Distribuisaun premiu iha kategoria rua: ba nasional no internasional tanba ne’e ba primeiru lugar full marathon ba national hetan osan $2000 ho medalia no internasional hetan $1000 ho medalia. Segundu lugar nasional hetan $1000 ho medalia internasional hetan $500 ho medalia no terseiru lugar nasional hetan 500 ho medalia internasional hetan $250 ho medalia.
Enkuantu ba meia marathon 21 km, primeiru lugar national hetan osan $1000 ho medalia, segundu hetan $500 no terseiru lugar hetan 250.
Kategoria nasional feto: primeiru lugar mak atleta Nelia Martins hetan osan montante $2000 ho medalia osan mean, Hermelinda de Jesus hetan osan $1000 ho medalia Silver no Aguida Amaral osan $500 ho medalia Bronze.
Kategoria national mane: full marathon primeiru lugar Romenio de Deus hetan osan $2000 ho medalia osan mean, Jeferino Guterres hetan osan $1000 ho medalia Silver no Simao Gonsalves hetan $500 ho medalia Bronze.
Kategoria Internasional feto: atleta Fereira Patricia husi Portugal hetan osan $1000 ho medalia osan silver.
