Governu liu husi Ministerio Saude no Komisaun Nasional Kombate HIV/SIDA (KNKS-TL) halo enkontru ho klinika privado sira hodi diskute kona ba formatu atendimentu ba ema ho Human Immunodeficiency Virus (HIV) hodi evita moras AIDS.
Sektretario Jeral KNKS-TL Daniel Marçal, hateten enkontru ne’e importante tebes atu fahe informasaun no responsabilidade ba malu hodi bele presta servisu atendimentu ne’ebe diak liu tan ba ema ne’ebe moris ona ho HIV.
Nia dehan, iha klinika privado lubuk ida mak durante ne’e halo hela atendimentu liu –liu teste ran, maibe laiha koordenasaun ne’ebe diak ho Ministerio Saude liu –liu fasilidade saude sira hodi halo tratamentu kontinuidade ba pasientes.
“Ami deside ona format ida atu uza hodi fo atendimentu diak liu tan ba ema ho HIV/SIDA, ita tenke fo atendimentu ida ne’ebe diak ba ema hotu entau presiza iha kontinuasaun ita labele husik hela iha dalan klaran,” nia hateten iha servisu fatin, Pantai Kelapa, Dili.
Nia hateten, presiza halo akompanhamentu ida ne’ebe diak no intensivu ho pasiente sira ne’ebe halo indentifikasaun foun tanba lafasil sira atu simu kondisaun ida ne’e.
Nia informa, total kazu ne’ebe registu iha Ministerio Saude husi 2003 to’o fulan Agustus 2017 iha ona kazu 600 resin no balun mate ona.
Nia hatutan, ho identifikasaun kazu ne’ebe iha hatudu maioria (90%) problema HIV da’et husi relasaun seksual livre katak relasaun seksual ho parseiru liu ema ida.
“Indikasaun ida atu fo hanoin ba ita liu –liu governu, inan-aman, sosiedade tomak tenke iha atensaun ba oan sira tanba mundu agora mundu modernu,” nia hateten.
Iha parte seluk, Pontu Focal HIV/SIDA Ministerio Saude Silvestre da Costa Sarmento hateten klinika privado sira pronto atu servisu hamutuk ho Ministerio Saude, liu –liu fasilidade saude sira hodi akompanha pasiente sira ne’ebe identifika.
“Sira apresia ho format referral ne’e, tanba durante ne’e sira identifika kazu foun, maibe depois la hatene tuir pasiente sira ne’e ba ne’ebe,” nia hateten.
Nia hateten, kooperasaun ne’e importante tebes atu bele hadia servisu atendimentu ba iha ema ne’ebe moris ona ho HIV.
Enkuantu, bainhira TDW koko konfirma ho reprezentante klinika privado sira kona ba mekanismu atendimentu ne’ebe klinika iha, maibe sira lakohi fo komentario tanba laiha autorizasaun husi lideransa klinika nain.
Klinika privado ne’ebe partisipa iha enkontru ne’e mak klinika Cito, Cindranita, Kura Hau, Bairo-Pite Klinik, Maternidade Fatumeta, Stanford no seluk tan ne’ebe durante ne’e halo teste ba iha ran.
