Kandidatas feto nain 29 husi partidus politiku 21 ne’ebe sei konkore iha elisaun parlamentar tinan 2017, tuir formasaun kona ba lideransa transformativu, papel no funsaun parlamentu, demokrasia inklui boa governasaun.
Diretora Ezekutivu Fundasaun Caucus (feto iha politika), Paula Corte Real hateten formasaun ida ne’e ho objetivu atu haforsa sira nia konesementu antes ba tuur hanesan membru parlamentu.
Nia dehan, informasaun baziku ne’ebe partisipante sira hetan mak hanesan funsaun knar komisaun sira nian, diferente entre projetu lei no proposta de lei, lala’ok fiskalizasaun no plenaria inklui boa governasaun.
“Bainhira sira nia partidu hetan fiar, konserteza feto sira ba tuur iha ne’eba, sira presiza hetan informasaun baziku sira kona ba funsaun no knar parlamentu nian, nune’e labele sai informasaun foun ba sira,” nia hateten iha salaun
formasaun Fundasaun Alola Dili.
Nia informa, kada partidus husu reprezentante nain rua, maibe partisipante ema nain 29 deit no reprezentante husi partidu bo’ot hanesan CNRT, FRETELIN, PLP no PD la marka prezensa.
Nia hatutan, partisipantes maioria primeira vez tama iha lista kandidatura no balun mos segunda vez, maibe la hetan kadeira atu tuur iha parlamentu iha elisaun sira liu ba.
Entretantu, reprezentante kandidatas Partidu Frente Mudansa, Odete Maia hateten formasaun ne’e pertenente tebes ba sira, tanba bele reforsa sira nia konesementu tanba barak mak mai husi area rural.
“Sira la’os membru parlamentu ona, maibe kandidatura balun mai husi munisipio, postu administrative, entaun ho oportunidade ida ne’e bele eleva tan ami nia kuinesementu konaba papel feto iha parlamentu,” nia hateten.
Kandidata numeru 6 ne’e, hateten problema dez-igualidade no sistema patriarcal sai motivasaun ba ami atu kandidata aan hodi koalia hasoru nivel altu sira hodi haree kestaun ne’e, tanba situasaun sira ne’e halo feto sira
sempre iha kotuk.
“Objetivu principal liu mak hatutan feto maluk sira ne’ebe laiha kbi’it atu koalia no fortifika hau nia kapasidade rasik iha vida ida ne’e,” nia hateten.
Alende ne’e, problema edukasaun, saude sai mos asuntu importante atu koalia hodi feto mos hetan oportunidade hanesan ba edukasaun nivel as.
Hanesan reprezentante kandidatas husi Partidu Republika, Terezina Maria Soares hateten informasaun ne’ebe sira hetan sei fahe fali ba iha maluk feto seluk iha partidu laran.
Ho idade ne’ebe ki’ik, Terezina hakarak involve aan iha partidu politika tanba haree iha problema barak ne’ebe feto sira hasoru laiha solusan, hanesan feto barak hamrok ba justisa, korupsaun ne’ebe buras halo terus feto no
labarik sira.
“Ita labele fuan ki’ik katak idade ki’ik ita labele, maibe ema hotu iha direitu entaun kapasidade ne’ebe hau iha, ne’e mos hakbi’it ona hau rasik atu tama iha vida politika,”nia hateten.
Nia hili Partidu Republika tanba hakarak dezenvolve aan iha vida politika liu husi partidu ki’ik sira.
