Organizasaun Feto Caucus (feto iha politika), sei fo formasaun ba treinador husi partidus politiku ne’ebe eziste hodi garantia sustentabilidade formasaun iha partidu laran.
Diretora Caucus, Paula Corte Real hateten depois elisaun parlamentar, sira sei fo formasaun ba iha treinador partidu sira atu kontinua fo formasaun ba iha feto politika iha partidu laran.
Nia dehan, sira halo ona koordenasaun ho lider partidus politiku atu implementa programa formasaun ida ne’e.
“Formasaun tenke kontinua iha partidu laran, labele hein elisaun mak foin halo,” nia hateten iha salaun Fokupers Farol, Dili.
Nia dehan, kada partidus sei husu reprezentante treinador nain rua hodi partisipa iha formasaun ne’ebe sei hala’o iha fulan Otubru tinan ne’e.
Iha parte seluk, reprezentante movimentu Feto Partidu Republikanu Terezina Maria Soares, hateten partidus liu –liu movimentu feto partidu republikanu iha kooperasuan ne’ebe diak tebes ho organizasaun feto sira iha area
formasaun.
Nia dehan, sira iha feto potensial balun ne’ebe iha kapasidade no konesementu diak ba vida poltika ne’ebe durante ne’e fo formasaun ba sira iha partidu laran.
“Ami hetan ona formasaun, hanesan oinsa koalia iha oin no sosiedade, kona ba politika no ami nia feto maluk sira nafatin ekonraja ami atu labele tauk koalia iha publiku,” nia hateten.
Hanesan mos professor, nia dehan matenek no informasaun ne’ebe sira hetan iha formasaun durante ne’e, sira sempre fahe fali ba malu iha partidu laran.
