Prezidente Komisaun Nasional Direitu Labarik (KNDL), Komisaria Maria Barreto apela ba inan- aman sira atu kontrola no labele lori oan sira tuir atividade kampanha partidus politiku nian.
Nia hateten, komisaun koalia ona ho kandidatu sira inklui partidus politiku atu labele involve labarik iha atividade kampanha, maibe realidade inan aman sira mak lori labarik sira partisipa.
“Ami nafatin halo advokasia ba nivel altu sira kona ba labarik nia dezenvolvimentu iha atividades kampanha, e husu inan-aman sira labele lori oan sira partisipa iha atividade kampanha partidus politiku,” nia apela, iha Farol, Dili.
Nia hateten, atividade sira ne’e risku tebes ba labarik sira tanba bele mosu violensia ne’ebe bele afeta ba sira nia saude fiziku no mental.
Enkuantu tuir observasaun Jornalista TDW nian iha tereinu, nota katak labarik barak ba ho inan- aman no balun ba mesak tanba aktividade kampanha halo besik sira nia hela fatin.
Entretantu, Francisco Soares nudar aman ida hateten bele lori oan sira partisipa iha atividade kampanha, maibe iha inan-aman nia kontrolu.
“Hau lori hau nia oan, maibe hau la husik sira mesak, hamutuk nafatin ho hau to’o programa nia rohan,” nia hateten.
Nia hateten, laiha inan-aman ida mak hakarak tau oan iha risku, tanba ne’e nafatin akompanha sira durante kampanha to’o remata.
Nia mos preokupa ho labarik sira ne’ebe tuir atividade kampanha sein konesementu husi inan- aman sira e ida ne’e risku bo’ot ba sira.
